Aravot.am-ի տեղեկություններով, Ագարակի պղնձամոլիբդենային կոմբինատի իրավասու մի խումբ աշխատակիցներ՝ օրենսդրությամբ իրենց վերապահված լիազորություններն օգտագործել են ի վնաս կոմբինատի, մասնավորապես՝ օգտակար հանածոյի արդյունահանման թույլտվության պահանջների էական խախտմամբ, շահագործել են հարստացուցիչ ֆաբրիկան։
Արդյունքում սահմանափակվել է «Ագարակ ՊՄԿ» ՓԲԸ-ի արտադրողականությունը, ինչի հետեւանքով 2024թ. հունվարի 29-ից սկսած ընդերքի նախատեսվածից պակաս արդյունահանման հետեւանքով կոմբինատին եւ Հայաստանի Հանրապետությանը պատճառվել է նյութական վնաս։
Հսկող դատախազի հանձնարարությամբ նախաձեռնված մեղադրանքով վարույթը փոփոխվել է․ «ՀՀ քրեական օրենսգրքի» 259 հոդվածի. 2-րդ մասի 2 եւ 3 կետերի մեղադրանքով (գույքային վնաս պատճառելը խաբեության, վստահությունը չարաշահելու կամ ապօրինի այլ եղանակով, որը կատարվել է իշխանական կամ ծառայողական լիազորությունները կամ դրանցով պայմանավորված ազդեցությունն օգտագործելով կամ առանձնապես խոշոր չափերի գույքային վնաս է պատճառել):
