«Իշխանության մեղքով են հայ գերիները գտնվում Բաքվում»,-այսօր կառավարության շենքի դիմաց ի պաշտպանություն Ռուբեն Վարդանյանի եւ մնացած հայ ռազմագերիների բողոքի ցույցի ժամանակ լրագրողներին ասաց «Վերածնվող Արցախ» շարժման համակարգող Անաստաս Իսրայելյանը:
Նրա խոսքով, իշխանություններն իրենց պահելաձեւով կրկնապատկում են դավաճանությունը. «Արցախը հանձնել են, ռազմագերիներին հանձնել են, որ այստեղ հանգիստ իրենց գործունեությունն իրականացնեն»:
Լրագրողի դիտարկմանը՝ այսինքն հնարավորություն ունե՞ին ռազմագերիներին վերադարձնելու, չե՞ն անում, ի պատասխան Անաստաս Իսրայելյանն ասաց.
«Մինչեւ օրս էլ բոլոր հնարավորությունները կան: Եթե իրենք հնարավորություն ունեն հանդիպել, պայմանավորվել, առեւտուր անել, ուրեմն այստեղ այդ հարցը պետք է առաջնային լինի: Առանց գերիների ազատության ի՞նչ հարցի քննարկում պետք է լինի: Բոլոր պետություններում, եթե հակամարտություն լինում է, բանակցային սեղանի շուրջ նախ եւ առաջ գերիների հարցն են լուծում, որ առիթ չլինի ուրիշ թեմաներից խոսելու: Եթե այդ հարցին անդրադարձ չկա, ուրեմն միասնական թուրք մեկ էլ այստեղի իշխանության ներկայացուցիչները համագորածկցելով իրականացնում են հակահայկական գործունեություն: Բայց տարիներ էլ անցնեն, այսպիսի դավաճանները միշտ էլ անիծված են լինելու»:
Հիշեցնենք, որ Ռուբեն Վարդանյանն արդեն մեկ շաբաթ է՝ հացադուլ է սկսել ու ինչպես իր պաշտպանն է հայտարարել, նրա առողջական վիճակը կտրուկ վատացել է:
Կարդացեք նաև
Արփինե ՍԻՄՈՆՅԱՆ
