Կառավարության այսօրվա նիստից հետո լրագրողներն արդարադատության նախարար Սրբուհի Գալյանից հետաքրքրվել են՝ կառավարությունն ի՞նչ աշխատանք է տանում Բաքվի բանտում խոշտանգված Ռուբեն Վարդանյանի եւ մյուս գերիների հարցով, ինչո՞ւ որեւէ հայտարարություն չեն անում։
Սրբուհի Գալյանը, սակայն, հստակ պատասխան չի տվել, կրկնելով Նիկոլ Փաշինյանի ու ՔՊ-ականների կողմից բազմիցս հնչած պատճառաբանությունը, թե չեն ուզում վնասել գործընթացին։ «Հարցի զգայունությունը հաշվի առնելով՝ մեկնաբանություններ տալ չեմ կարող»,- նշել է նախարարը։
Սրբուհի Գալյանը հավելել է, որ «կառավարության կողմից ջանքեր գործադրվում են, բայց այդ ջանքերի ու քայլերի մասին խոսելը գուցե եւ վնասի այնտեղ գտնվող անձանց»։
Լրագրողները նկատել են, որ Բաքվի բանտում ապօրինաբար գտնվող հայ գերիները Հայաստան պետության աջակցության կարիքն ունեն, նրանց այնտեղ խոշտանգում են, ինչն ակնհայտ երեւում է Ռուբեն Վարդանյանի երեկվա լուսանկարներում, ի՞նչ է անում Հայաստանի իշխանությունը։ Սրբուհի Գալյանն ի պատասխան կրկնել է, որ հարցի հետ կապված մեկնաբանություններ չի ցանկանում տալ։
Կարդացեք նաև
Ըստ նրա՝ չխոսելով այս հարցերի մասին՝ իրենք մեղմում են ռիսկերը։ «Ձեր կարծիքով՝ ձեր սիրտն ավելի՞ է ցավում, քան կառավարությունում։ Եթե ձեր կարծիքով լռությունն անգործություն է, ապա ասելու բան չունեմ»,- ասել է նախարարը։
Ռոզա ՀՈՎՀԱՆՆԻՍՅԱՆ
