Հայաստան-ԵՄ Խորհրդարանական գործընկերության կոմիտեի չորրորդ նիստում ԵԽ պատգամավորներից մեկը հայտարարել է, թե Եվրամիությանը Հայաստանի անդամակցության ճանապարհը հեշտ չի լինելու, «նախ պետք է ժամադրություն լինի, և միայն հետո՝ ամուսնություն», ԱԺ «Պատիվ ունեմ» խմբակցության պատգամավոր Հայկ Մամիջանյանն էլ հակադարձել է, թե «մենք արդեն ամուսնացած ենք, մենք ԵԱՏՄ անդամ ենք, դուք արդեն իսկ ամուսնացած մարդու եք մոտեցել»։ Ի պատասխան՝ ԵԽ պատգամավորը հետաքրքրվել է, թե «արդյո՞ք այդ ամուսնությունը սիրո վրա է հիմնված»։
ԵԽ պատգամավորը, իհարկե, հեգնելու փոխարեն կարող էր հիշեցնել, որ ոչ թե իրենք են մոտեցել «արդեն իսկ ամուսնացած մարդու», այլ Նիկոլ Փաշինյանն է ինքնակամ նետվել ժամադրությունների ու ամեն ժամադրության ընթացքում հայտարարել, թե պատրաստ է «այնքան խորը հարաբերություններ ունենալ, որքան Եվրամիությունը հնարավոր կհամարի»։ Ինչ վերաբերում է Հայկ Մամիջանյանին, ապա նա, ըստ երևույթին, մինչև վերջ չի ընկալել Նիկոլ Փաշինյանի «Իրական Հայաստանի գաղափարախոսությունը»։ Այնտեղ սևով սպիտակի վրա գրված է, որ իրական անկախությունը շատերից կախված լինելն է, հետևաբար՝ ինչքան շատ երկրներից կախված լինենք, այնքան ավելի անկախ կլինենք։ Նույն տրամաբանությամբ էլ՝ ամուսնության ամրության գրավականը հնարավորինս շատերի հետ ամուսնական հարաբերություններ ունենալն է։ Ճիշտ է, նման «գաղափարախոսությամբ» առաջնորդվող կանանց սովորաբար այլ կերպ են կոչում, և ով որտեղ բռնում՝ հետը «ժամադրությունների փուլ» է իրականացնում, բայց Նիկոլ Փաշինյանին դա հազիվ թե մտահոգի։ Կարևորը՝ այդ ընթացքում իրեն նաև կերակրում ու գովեստի խոսքեր են ասում։
Մեկնաբանությունը՝ «Չորրորդ իշխանություն»-ից
