«Հիմա չե՞ք բացելու, մտնենք ներս»,- այսօր «Երեւանի ավտոբուս» ՓԲԸ դիմաց ընկերության անվտանգության աշխատակիցներին էին հարցնում ավագանու «Մայր Հայաստան» խմբակցության անդամները:
Հիշեցնենք, որ ավագանու անդամները «Երեւանի ավտոբուս» ՓԲԸ էին գնացել՝ համացանցում հայտնված սկանդալային ձայնագրությունների հետքերով: Ըստ այդ ձայնագրությունների՝ ավտոբուսների վարորդներին հրահանգվում էր ավտոբուսից իջեցնել չվճարող քաղաքացիներին:
«Մեր բնակիչներին թուլա ասողներից կա՞ էստեղ, էդ թուլան էստե՞ղ է, թե՞ չէ»,- ընկերության անվտանգության աշխատակիցներից շարունակում էին հետաքրքրվել ավագանու անդամները: Իրենց անպատասխան հարցերից հետո ավագանու անդամներից Գեւորգ Ստեփանյանը հայտարարեց, որ «Երեւանի ավտոբուս» ՓԲԸ-ի ղեկավարություն գոյություն չունի. «Էս մարդիկ էս են՝ վախկոտ, քաղաքացիներին վիրավորելով, անպատասխան թողնելով… Երեւան քաղաքում իշխանություն գոյություն չունի: 9 տոկոսանոցները հիմա ընդհանրապես չեն կարողանում կառավարել»:
Կարդացեք նաև
Գեւորգ Ստեփանյանն ասաց, որ քաղաքացիներին ուղղված այդ վիրավորանքների պատասխանը պետք է ստանան Տիգրան Ավինյանից, եթե այնտեղից էլ պատասխան չստանան, բոլոր ընթացակարգերը լինելու են:
Արփինե ՍԻՄՈՆՅԱՆ
