Aravot.am-ի տեղեկություններով, Երեւանի թիվ 4 արհեստագործական պետական ուսումնարանի տնօրեն Կամո Համբարձումյանը հաղորդում է տվել, որ 2024թ. ապրիլի 18-ից դեկտեմբերի 12-ն ընկած ժամանակահատվածում ուսումնարանի նշված ժամանակահատվածի տնօրենի պարտականությունները կատարող Մարինե Մատինյանը տարբեր մարդկանց ընդունել է աշխատանքի՝ առանց հիմնավոր փաստաթղթերի, 0,33 տոկոսով բարձրացրել իր եւ այդ մարդկանց աշխատավարձները, չի հաճախել աշխատանքի:
Ըստ նույն աղբյուրի, կազմված փաստաթղթերն ուղարկվել են քննչական բաժին:
Aravot.am-ը թեմայի վերաբերյալ մեկնաբանություն ստանալու ակնկալիքով փորձեց կապվել Կամո Համբարձումյանի հետ: Տնօրենի ընդունարանից պատասխանեցին, որ նա մեզ հետ կկապվի, երբ ազատ կլինի:
Ի դեպ, անցյալ տարի էլ ՀՀ Քննչական կոմիտեն հաղորդագրություն էր տարածել, որ Երեւանի թիվ 4 արհեստագործական պետական ուսումնարան ՊՈԱԿ-ի տնօրենին մեղադրանք է ներկայացվել՝ ծառայողական լիազորությունները չարաշահելու համար: Ըստ Քննչական կոմիտեի հաղորդագրության, շահավետ պայմաններում ձեռնարկատիրական գործունեություն իրականացնելուն նպաստելու նպատակով տնօրենը 2020 թ. մարտին ձեւական հուշագիր էր ստորագրել իր հետ ընկերական հարաբերությունների մեջ գտնվող անձի հետ՝ ՊՈԱԿ-ի տարածքից 265.2 քմ տարածք վարձակալությամբ տալու վերաբերյալ։
Գոհար ՀԱԿՈԲՅԱՆ
