Shamshyan.com. Այն, որ Երևանում կան բազմաթիվ փողոցներ, որոնք բնակիչների համար դարձել են պատուհաս՝ ակնհայտ է։ Կան բազմաթիվ փողոցներ, որոնց հարակից շենքերի բնակիչները կարծես հայտնվում են պատանդի կարգավիճակում։ Նմանատիպ փողոցներից է համարվում Երևանի սրտում, Մեսրոպ Մաշտոցի անվան Մատենադարանի հարևանությամբ, Մաշտոցի պողոտայից սկիզբ առնող Անտառային փողոցը, որտեղ բնակվում են բազմաթիվ քաղաքացիներ, ովքեր կարծես գերի լինեն, որոշ վայ վարորդների կողմից կատարված անթույլատրելի գործողությունների պատճառով։
Օրեր առաջ անգամ նշված վայրից ահազանգ է ստացվել շտապօգնություն, սակայն ժամանած բժիշկների հերթապահ խումբը տևական ժամանակ չի կարողացել հաղթահարել այդ հատվածը, քանի որ բազմաթիվ ավտոմեքենաներ անկանոն կայանել էին և տպավորություն էր ստեղծվել, որ այն ոչ թե բնակելի վայր է, այլ ավտոշուկա։
Ֆոտոլրագրողի հետ զրույցում բնակիչները, որոնք հրաժարվեցին տեսախցիկի առաջ խոսել, ասում էին․ «Ո՞վ է տեսել քաղաքի կենտրոնում նման բարձիթողի վիճակ։ Բազմաթիվ անգամ ահազանգել ենք Երևանի քաղաքապետարան, նախկին ճանապարհային ոստիկանություն, հիմա արդեն Պարեկային ծառայություն, բայց ոչ մի դրական պատասխան։
Ամոթն էլ է լավ բան, մի հատ հրդեհ լինի, մի արտակարգ դեպք լինի, ո՞նց եք բնակիչներին տարհանելու։ Ո՞նց են հրշեջ մեքենաները մոտենալու, դեռ շտապ օգնությանը ինչ որ տեղ պացիենտին պատգարակով կմոտեցնեն, բա եթե հրդեհ եղավ, հրշեջ մեքենաները օդո՞վ են գալու։ Ասում եք՝ տուրիզմ եք զարգացնում, Մատենադարանը օրական աշխարհի տարբեր ծայրերից զբոսաշրջիկներ են այցելում ու նրանք ականատես են լինում, թե ինչպիսի երթևեկության քաոս է տիրում շուրջ բոլորը»։
Կարդացեք նաև
Լուսանկարը՝ Գագիկ Շամշյանի
Նյութն ամբողջությամբ՝ սկզբնաղբյուր կայքում:
