«Դուք նշեցիք ատելության խոսքի մասին, կուզեի կարճ մեկնաբանեք՝ Դուք նստած եք պարոն Եղոյանի կողքին, որի խմբակցության քարտուղարը ԱԺ մարդու իրավունքների պաշտպանության հանձնաժողովում մարդու իրավունքների պաշտպանի ընտրության ժամանակ ընդդիմության թեկնածուին ասել է՝ ականջներդ կկտրեմ։ Եվ մինչ օրս որևէ քրեական գործ չի հարուցվել»,-Հայաստան-ԵՄ խորհրդարանական գործընկերության կոմիտեի 4-րդ նիստի ժամանակ ՀՀ արդարադատության նախարար Սրբուհի Գալյանին հիշեցրեց ՀՀ ԱԺ «Պատիվ ունեմ» խմբակցության ղեկավար Հայկ Մամիջանյանը։
Հայկ Մամիջանյանը նաև նշեց, որ մի շարք միջազգային կազմակերպությունների բանաձևերում նշվում է, որ ՀՀ-ում կան քաղբանտարկյալներ և ՀՀ կառավարությանը կոչ է արվում չօգտագործել իրավապահ համակարգը քաղաքական ընդդիմախոսների դեմ․ «Մասնավորապես ՀՀԿ փոխնախագահ Արմեն Աշոտյանը, ընտրված քաղաքապետեր Մամիկոն Ասլանյանը, Առուշ Առուշանյանը, Բալասանյանների և այլ դեպքերի մասին։ Նաև կուզեի Ձեր մեկնաբանությունը Եվրոպական դատավորների միության հայտարարության հետ կապված, որտեղ նշվում էր, որ ՀՀ-ում դատաիրավական համակարգը կախվածության մեջ է գտնվում իշխանություններից։ Այդ թվում կուզեի նաև Ձեր դիրքորոշումը վերջերս Բրյուսելում կայացած մարդու իրավունքների հետ կապված Human dialogue ձևաչափով հանդիպման ժամանակ այն փաստին, որ ՀՀ իշխանություններին կոչ է արվում սահմանափակել նախաքննական կալանքների տևողությունը»։
Հայկ Մամիջանյանը նաև բերեց Էդգար Ղազարյանի օրինակը, որի նկատմամբ դատարանն իրականացրել է վարչական սահմանափակում՝ արգելելով արտահայտվել դատավորների մասին։ Ու նաև ասաց՝ իր տեղեկություններով՝ պատճառը ՍԴ դատավոր, շուտով ՄԻԵԴ դատավոր Վահե Գրիգորյանի դիմումն է եղել, երբ Էդգար Ղազարյանը որակմամբ գնահատել էր նրա որոշումներից մեկը։
Կարդացեք նաև
Կալանքների հետ կապված ՀՀ արդարադատության նախարար Սրբուհի Գալյանն ասաց․ «Նախարարության համար էլ մտահոգիչ է կալանքների քանակական աճը։ Այս առումով խնդիրը մեր ուշադրության կենտրոնում է։ Պետք է որոշակի չափորոշիչներ և ուղեցույցներ մշակել կալանքի կիրառման դեպքերը նվազեցնելու հետ կապված և հարցը կոմունիկացնել իրավապահ համակարգի և դատարանների հետ»։
Անդրադառնալով մյուս հարցերին՝ նախարարն ասաց․ «Առաջին հայացքից Դուք խոսում եք ճշմարտության մասին, բայց դրան հակադարձում է օրենքի գերակայություն ասած ճշմարտությունը։ Մենք պետք է հասկանանք՝ Ձեր կողմից նշված անձանցից շատերը հետապնդվում են իրենց պաշտոնավարման տարիների ընթացքում կատարած պաշտոնական լիազորությունների չարաշահման համար։ Դժվար է պատկերացնել, որ այդ հետապնդումները կարող են քաղաքական բնույթ ունենալ։ Այս կառավարության օրոք քրեական հետապնդում է հարուցվել գործող նախարարների նկատմամբ, երևույթներ, որոնք նախորդ իշխանության օրոք երբևէ չեն եղել»։
Տաթև ՀԱՐՈՒԹՅՈՒՆՅԱՆ
