«Ամերիկայի ձայն». ԱՄՆ նախագահ Դոնալդ Թրամփը և Ֆրանսիայի նախագահ Էմանուել Մակրոնը երկուշաբթի օրն արտահայտեցին իրենց մոտեցումների կտրուկ տարբերություններն Ուկրաինայի հարցում:
Երկու առաջնորդների միջև մեկ օրվա բանակցությունների ընթացքում Թրամփը և Մակրոնը ցուցաբերեցին բարեկամական փոխըմբռնում, որը հիմնված էր երկարամյա լավ կապերի վրա: Այնուամենայնիվ, Մակրոնը հասկացրեց, որ ինքը համաձայն չէ Թրամփի հետ որոշ առանցքային հարցերի շուրջ։
Թրամփը հրաժարվել է Ռուսաստանի նախագահ Վլադիմիր Պուտինին դիկտատոր անվանել այն բանից հետո, երբ անցած շաբաթ Ուկրաինայի նախագահ Վոլոդիմիր Զելենսկուն դիկտատոր անվանեց։ Մակրոնն ասել է, թե պարզ է, որ Ռուսաստանն «ագրեսորն է» հակամարտության մեջ։
Թրամփը շուտափույթ հրադադարի ցանկություն է հայտնել և ասել, որ փորձում է բանակցել Ուկրաինայի և Ռուսաստանի հետ։ Նա ասել է, որ համաձայնության գալուց հետո կարող է մեկնել Մոսկվա՝ հանդիպելու Պուտինի հետ:
Կարդացեք նաև
Մակրոնը, ընդհակառակը, կոչ է արել ավելի կշռադատված մոտեցում ցուցաբերել՝ սկսելով զինադադարից, ապա խաղաղության համաձայնագրից, որը ներառում է անվտանգության երաշխիքներ:
«Մենք ցանկանում ենք որքան հնարավոր է շուտ խաղաղություն, բայց թույլ համաձայնություն չենք ուզում»,- լրագրողներին ասել է Մակրոնը։
Ցանկացած խաղաղ համաձայնագիր պետք է «գնահատվի, ստուգվի և հաստատվի», – ասել է նա։
Երկու ղեկավարները պայմանավորվել են տեղակայել եվրոպական խաղաղապահ ուժեր, եթե խաղաղ համաձայնագիր ձեռք բերվի:
«Նրանք առաջին գծում չեն լինելու։ Նրանք չեն մասնակցի հակամարտությանը. Նրանք այնտեղ կլինեն՝ ապահովելու, որ խաղաղությունը պահպանվի»,-ավելի վաղ Թրամփի հետ Օվալաձև աշխատասենյակում ասել է Մակրոնը:
Թրամփն ասել է, որ ընդունում է հայեցակարգը, ինչպես և Պուտինը:
«Այո, նա կընդունի դա։ Ես կոնկրետ այս հարցը նրան տվեցի։ Նա դրա հետ խնդիր չունի»,– ասել է Թրամփը խաղաղապահ ուժերի վերաբերյալ Պուտինի դիրքորոշման մասին:
Մակրոնը՝ առաջին եվրոպացի առաջնորդը, ով այցելել է Թրամփին՝ մեկ ամիս առաջ իշխանության վերադառնալուց հետո, Թրամփի հետ իր զրույցները անվանել է «շրջադարձային կետ» ավելի միասնական մոտեցման գնալու հարցում։
Օվալաձև աշխատասենյակում իրենց հանդիպման ժամանակ Մակրոնը նրբորեն ուղղեց ԱՄՆ նախագահին, ով պնդում էր, որ Եվրոպան տրամադրել է իր ողջ օգնությունը վարկերի տեսքով։
Թրամփն ասել է, որ առաջընթաց է ձեռք բերվում Ուկրաինայի հետ եկամուտների բաշխման համաձայնագրի ուղղությամբ՝ ուկրաինական հանքանյութերի վերաբերյալ, որպես Բայդենի նախորդ վարչակազմի կողմից Ուկրաինային մատակարարված զենքի արժեքը փոխհատուցելու միջոց: Թրամփը նշել է, թե ակնկալում է, որ Զելենսկին այս շաբաթ կամ հաջորդ շաբաթ կգա ԱՄՆ՝ ստորագրելու համաձայնագիրը։
Թրամփը և նրա թիմը բանակցում են Ուկրաինայի հետ եկամուտների բաշխման մասին համաձայնագրի շուրջ՝ վերադարձնելու այն գումարի մի մասը, որը Բայդենի նախորդ վարչակազմը զենքի տեսքով ուղարկել էր Կիև՝ ռուսական ներխուժումը հետ մղելու համար:
Անցած շաբաթ Զելենսկին մերժեց Ուկրաինային 500 միլիարդ դոլարի օգտակար հանածոներ ստանալու համար ԱՄՆ-ի պահանջները՝ փոխհատուցելու Վաշինգտոնին պատերազմում նրա օգնության համար՝ ասելով, որ ԱՄՆ-ը դեռևս չի տրամադրել այդ գումարը և չի առաջարկել անվտանգության որևէ հատուկ երաշխիք համաձայնագրում:
Հարցին, թե հնարավոր է, որ Ուկրաինան ստիպված լինի որոշ տարածքներ զիջել Ռուսաստանին, Թրամփը պատասխանել է. «Դե, կտեսնենք»: Մակրոնն ասել է, որ ցանկացած համաձայնագիր պետք է ներառի Ուկրաինայի ինքնիշխանությունը։
Մակրոնն առաջին եվրոպացի առաջնորդն է, որն այցելել է ԱՄՆ՝ Թրամփի երկրորդ նախագահական ժամկետի մեկնարկից ի վեր։ Հինգշաբթի օրը Վաշինգտոն կժամանի նաև Մեծ Բրիտանիայի վարչապետ Քիր Սթարմերը՝ հանդիպելու ԱՄՆ նախագահի հետ։ Նա ավելի վաղ ասել էր, որ Բրիտանիան նույնպես պատրաստ է խաղաղապահ զորքեր տրամադրել Ուկրաինային։
