ՀՀԿ փոխնախագահ Արմեն Աշոտյանի գործով դատական նիստի ընթացքում այսօր հարցաքննվեց ԵՊԲՀ տնտեսական վարչության պետ Սամվել Բարոյանը: Մյուս վկան՝ Վաչիկ Սաղաթելյանը նիստին չէր ներկայացել ոտքի կոտրվածքի պատճառով։
Մեղադրող դատախազ Արամ Դոլինյանը, դիմելով վկային, նշեց՝ ի պաշտոնե Դուք պետք է ընդունեիք-հանձնեիք Ծովասարում ձեռք բերված գույքը, և Ձեր նախաքննական ցուցմունքում նշում եք, որ ոչ ոք Ձեզ չի տեղեկացրել այդ գույքերի ձեռքբերման մասին, ընդունման հանձնմանը չեք մասնակցել։ Այս առիթով Սամվել Բարոյանն ասաց․ «Հրահանգ չեմ ստացել»։ Դատախազը հստակեցրեց՝ Ձեզ մոտ հարց չի՞ առաջացել՝ ինչո՞ւ նման հրահանգ չի եղել, վկան պատասխանեց․ «Եթե հրահանգ չի եղել, ուրեմն նշանակում է, որ պետք չի եղել, որ ինձ հրահանգ տային»։
Նշենք, որ հանրային մեղադրող Արման Նշանյանն այլևս չի պաշտպանելու մեղադրանքը այլ աշխատանքի անցնելու կապակցությամբ:
Նախագահող դատավոր Վահե Դոլմազյանը վկային հարցրեց՝ ի՞նչ հանգամանքներում է 2016-ին տեղեկացել, որ համալսարանը Ծովասարից գույք է ձեռք բերել։ Վկան պատասխանեց․ «Այնտեղ ռեկտորատի արտագնա նիստ ենք արել»։
Կարդացեք նաև
Նախագահող դատավորի մյուս հարցը վերաբերում էր վկայի՝ լրավճար ստանալու հանգամանքին։ Նա էլ ասաց․ «Իմ գանգատն է եղել միշտ, որ աշխատանքի ծանրաբեռնվածության համեմատ աշխատավարձս քիչ է։ Դա է եղել»։
Այնուհետև նախագահող դատավորը նաև քննեց Արմեն Աշոտյանի պաշտպան Ռուբեն Մելիքյանի միջնորդությունը թույլատրել նրան այցելել նոտարական բաժանմունք ժառանգության հարցերով։
Վահե Դոլմազյանը բավարարեց միջնորդությունը և թույլ տվեց, որ հաջորդ դատական նիստից հետո՝ մարտի 4-ին Արմեն Աշոտյանին ուղեկցեն նոտարական գրասենյակ, որից հետո բնակության վայր։
Հաջորդ դատական նիստը տեղի կունենա մարտի 4-ին՝ ժամը 10։00-ին։
Տաթև ՀԱՐՈՒԹՅՈՒՆՅԱՆ
