Բրյուսել, 24 փետրվարի 2025թ
Արևելյան գործընկերության Քաղաքացիական հասարակության ֆորումը, որի անդամն է Հելսինկյան քաղաքացիական ասամբլեայի Վանաձորի գրասենյակը, խստորեն դատապարտում է նախագահ Թրամփի կտրուկ փոփոխությունները և Ռուսաստանի հետ բանակցություններում Ուկրաինային շրջանցելը ։ Մենք կոչ ենք անում Եվրոպական Միությանը և նրա անդամ պետություններին հանդես գալ միասնական դիրքորոշմամբ և վճռականորեն դիմակայել Ուկրաինայի և ուկրաինացի ժողովրդի դեմ Ռուսաստանի ագրեսիվ պատերազմին։
2025 թվականի փետրվարի 24-ը ցավալիորեն նշանավորում է Ուկրաինայի դեմ Ռուսաստանի անհիմն և լայնածավալ ներխուժման երրորդ տարելիցը։ Վերջին երեք տարիների ընթացքում Ուկրաինան և ուկրաինացի ժողովուրդը հերոսական տոկունություն են դրսևորել ռուսական անողոք ագրեսիայի դեմ և պաշտպանել ազատությունը, խաղաղությունը, ժողովրդավարությունը և եվրոպական արժեքները:
2022 թվականի փետրվարի 24-ից ի վեր Ռուսաստանը սպանել է ավելի քան 11,000 խաղաղ բնակիչների և իրականացրել է ագրեսիայի և ռազմական հանցագործությունների ավելի քան 156,000 փաստագրված դեպք Ուկրաինայի և ուկրաինացի ժողովրդի դեմ՝ պատճառելով ավերիչ կորուստներ և զգալի ավերածություններ քաղաքացիական ենթակառուցվածքներին:
Կարդացեք նաև
Համակարգված հարձակումները անխտիր ավերել են բնակելի թաղամասեր, հիվանդանոցներ, էներգետիկ օբյեկտներ, նավահանգիստներ և շրջակա միջավայրը՝ առաջացնելով ծանր հումանիտար և տնտեսական վնասներ։
Ռուսաստանը շարունակում է ապակայունացնել Ուկրաինան և Արևելյան գործընկերության ողջ տարածաշրջանը՝ կիրառելով արտատարածքային բռնություն, մարդու իրավունքների խախտումներ, միջամտություն, քարոզչություն և հիբրիդային սպառնալիքներ՝ դարձնելով Ուկրաինայի դեմ իր լայնածավալ ներխուժումը Արևելյան գործընկերության երկրների առաջնային սպառնալիքը։
Վերջերս կայացած Մյունխենի անվտանգության համաժողովը ընդգծեց միջազգային առաջնորդների խորացող տարաձայնությունները Ռուսաստանի ագրեսիվ պատերազմի և եվրոպական անվտանգության վերաբերյալ: Վերջին զարգացումները, ներառյալ ԱՄՆ-Ռուսաստան բանակցությունները Սաուդյան Արաբիայում և ԱՄՆ նախագահ Թրամփի սոցիալական ցանցերում ուղիղ հարձակումները Ուկրաինայի նախագահ Զելենսկու դեմ չափազանց մտահոգիչ նշաններ են Ուկրաինային քաղաքական, ռազմական և ֆինանսական կայուն և անհրաժեշտ աջակցության շարունակության համար:
Ընթացող խաղաղ բանակցությունների լույսի ներքո.
Եվրամիությունը և Ուկրաինան պետք է նստեն բանակցությունների սեղանի շուրջ՝ դադարեցնելու Ռուսաստանի ագրեսիվ պատերազմը։ Ուկրաինային բանակցությունների սեղանից դուրս թողնելը՝ երբ որոշվում է նրա ապագան, նրա ինքնիշխանության անթույլատրելի անտեսում կլինի և ուղղակի դրդապատճառ Եվրոպայի դեմ ապագա ագրեսիվ գործողությունների համար։ Առանց Ուկրաինայի լիիրավ մասնակցության կնքված ցանկացած համաձայնագիր կզրկվի լեգիտիմությունից, վտանգի կենթարկի իր ժողովրդի կարիքներն ու անվտանգության շահերը և կդառնա վտանգավոր նախադեպ, որտեղ ագրեսորները պայմաններ են թելադրում իրենց զոհերին: Երկարատև խաղաղության կարելի է հասնել միայն երկխոսության միջոցով, որը հարգում է Ուկրաինայի ինքնիշխանությունն ու տարածքային ամբողջականությունը, այլ ոչ թե արտաքին գործարքների միջոցով, որոնք արհամարհում են նրա իրավունքները և գործողությունները:
Խաղաղության բոլոր բանակցությունները պետք է համապատասխանեն Ուկրաինայի առաջարկած Խաղաղության Բանաձևին: Բանակցությունները պետք է ապահովեն, որ միջազգային իրավունքի վրա հիմնված և Ուկրաինայի կողմից սահմանված սկզբունքներն ու պայմանները առանցքային են ցանկացած քննարկման համար, որն ուղղված է արդար և կայուն խաղաղության հասնելուն՝ ապահովված անվտանգության երաշխիքներով, ինչպես վերակառուցման, այնպես էլ որպես ԵՄ ապագա անդամի: Այդ երաշխիքները պետք է ներառեն հստակ դրույթներ, որ Ռուսաստանն այլևս սպառնալիք չի լինի Ուկրաինայի և Եվրոպայի համար։ Խաղաղության բանակցությունները պետք է ներառի ՆԱՏՕ-ին Ուկրաինայի անդամակցության հստակ ժամանակացույց:
Ուկրաինայի ինքնիշխանությունը, նրա տարածքային ամբողջականությունը և 2014 թվականից առաջվա սահմանները պետք է հարգվեն։
Եվրոպական առաջնորդների կողմից Փարիզում անցկացված արտակարգ գագաթաժողովը ցույց տվեց տարաձայնությունները այն պահին, երբ Եվրոպական Միությունը պետք է միասնաբար և մեկ ուժեղ ձայնով արձագանքեր Ուկրաինայի ինքնիշխանությանն ուղղված աճող սպառնալիքներին: Հետևաբար, մենք կոչ ենք անում ԵՄ-ին և նրա անդամ երկրներին.
Ընդունել ավելի համարձակ որոշումներ՝ շարունակելով քաղաքական, հումանիտար, ռազմական և ֆինանսական աջակցության ցուցաբերումը Ուկրաինային՝ արդար և երկարատև խաղաղության հասնելու համար,
Պահպանել Ուկրաինայի ինտեգրումը ԵՄ-ին որպես Միության քաղաքական օրակարգի առանցքային առաջնահերթություն: Ուկրաինայի անդամակցության գործընթացն առաջ մղելը և ագրեսիվ պատերազմում նրա հաղթանակի ապահովումը պահանջում են ԵՄ-ի և նրա անդամ պետությունների անսասան հանձնառությունը,
Շարունակել տրամադրել էական աջակցություն Ուկրաինային իր պաշտպանության ջանքերում՝ տրամադրելով ռազմական օգնություն՝ ներառյալ զենք, զինամթերք, սարքավորումներ, հետախուզական և կիբերանվտանգության աջակցություն,
Պատժամիջոցների 16-րդ փաթեթի ընդունումից հետո շարունակել Ռուսաստանի դեմ պատժամիջոցների նոր փաթեթների ակտիվ ընդունումը՝ ուժեղացնելով վստահելի միջոցները՝ ավելի լավ կանխելու և վերահսկելու պատժամիջոցների շրջանցումը,
ԵՄ-ում սառեցված ռուսական պետական ֆինանսական ակտիվները հասանելի դարձնել Ուկրաինայի վերակառուցման համար,
Ավելացնել աջակցությունը ուկրաինական քաղաքացիական հասարակությանը և անկախ ԶԼՄ-ներին՝ նրանց ձայնը ավելի բարձրացնելով ԵՄ-ում և Ուկրաինայի անվտանգության, հետպատերազմյան վերականգնման և վերակառուցման գործընթացների վերաբերյալ բարձր մակարդակի քննարկումներում,
Կիրառել նշանակալի միջոցներ՝ Ուկրաինայում քաղաքացիական հասարակության ակտիվիստների պաշտպանության համար, ովքեր համարձակորեն զբաղվում են Ռուսաստանի հարձակումների և Ուկրաինայի ժողովրդի դեմ իրականացված հանցագործությունների հետևանքով տուժած քաղաքացիական անձանց կարիքների լուծմամբ։
Վերջերս Ուկրաինայի նկատմամբ Ագրեսիայի հանցագործության համար Հատուկ դատարանի ստեղծման համար հիմք հանդիսացող իրավական հիմքերը և Միջազգային պահանջների հանձնաժողովի ստեղծումը զգալի առաջընթաց են արձանագրում՝ Ուկրաինայի և ուկրաինացի ժողովրդի համար արդարություն ապահովելու ուղղությամբ։ Այդ պատճառով մենք կոչ ենք անում միջազգային հանրությանը՝
Ապահովել ամբողջական պատասխանատվություն Ուկրաինայում ռուսական իշխանությունների և ռազմական ուժերի կողմից իրականացված հանցագործությունների համար: Միջազգային դատախազները և դատական մարմինները պետք է վճռական գործողություններ ձեռնարկեն՝ պատասխանատվության ենթարկելու ուկրաինացի ժողովրդի դեմ կատարված հանցագործությունների համար պատասխանատուներին՝ ապահովելով արդարադատության իրականացում Ռուսաստանի կոպտագույն խախտումներից տուժածների համար
Բարելավել աջակցությունը Ուկրաինայի ազգային իշխանություններին՝ Ռուսաստանի ագրեսիայի հանցագործությունների հետ կապված ազգային քննությունները և հետապնդումները իրականացնելու գործում, ինչպես նաև ապագա քրեական հետապնդումների համար հիմնական ապացույցներ ապահովելու հարցում:
Հաշվի առնելով ԱՄՆ միջազգային զարգացման գործակալության (USAID) կողմից ամերիկյան արտաքին օգնության ծրագրերի ֆինանսավորման դադարեցումը, Արևելյան գործընկերության Քաղաքացիական հասարակության ֆորումը հորդորում է Դոնորական համայնքին լրացնել այն բացը, որը ստեղծվել է USAID-ի աշխատանքների անսպասելի և աննախադեպ դադարեցման արդյունքում, և կոչ անում ավելացնել ֆինանսական միջոցներ՝ Ուկրաինայում քաղաքացիական հասարակությանը, անկախ մամուլին և հումանիտար նախագծերին աջակցելու համար։
Արևելյան գործընկերության Քաղաքացիական հասարակության ֆորումը շարունակում է միասնական լինել՝ լիակատար աջակցություն ցույց տալով Ուկրաինային և ուկրաինացի ժողովրդին իրենց հերոսական դիմադրության մեջ հանուն ազատության և ժողովրդավարական եվրոպական ապագայի, և հարգանքի տուրք մատուցելով Ռուսաստանի ագրեսիվ պատերազմի զոհերին:
Փառք Ուկրաինային
Հելսինկյան քաղաքացիական ասամբլեայի Վանաձորի գրասենյակ
