Հայազգի հայտնի կատակերգու, ռուսաստանցի Միխայիլ (Նշան) Գալուստյանի անունը ներառվել է Ռուսաստանի Դաշնության դեմ ԵՄ պատժամիջոցների 16-րդ փաթեթում, հայտնում է «Իզվեստիան»:
Միխայիլ Գալուստյանը РИА Новости հետ զրույցում խոստովանել է, որ ԵՄ պատժամիջոցների ցանկում հայտնվելն իր համար կատարյալ անակնկալ էր. «Թվում է, թե եվրոպացի քաղաքական գործիչներին ոչինչ չի մնում պաշտպանվելու, քանի որ դերասաններն ու մշակութային գործիչները, կատակերգուներն ու երգիծաբանները, ովքեր ուրախություն և ժպիտ են պարգևում մարդկանց, սկսել են հետապնդումների և պատժամիջոցների ենթարկվել։ Մենք շատ ենք՝ մի ամբողջ բանակ։ Դուք չեք կարող մեզ բոլորիս փակել: Դուք պետք է հոգ տանեք ձեր քաղաքացիների մասին: Մենք անպայման նորից կտեսնվենք»։
Եվրամիությունը պատժամիջոցներ է կիրառել նաև հեռուստահաղորդավարուհի Յուլիա Բարանովսկայայի նկատմամբ:
Պատժամիջոցների ներքո են նաև սենատոր, շախմատիստ Սերգեյ Կարյակինը, օլիմպիական չեմպիոն Նիկիտա Նագորնին, Ավիաշինական միացյալ կորպորացիայի ղեկավար Վադիմ Բադեխան, գործարար Ալբերտ Ավդոլյանը, ինչպես նաև սենատորներ Յուրի Նիմչենկոն և Անդրեյ Դերկաչը։
