Ինչպես հայտնում է «Լուրերը», Գերմանիայի խորհրդարանի արտահերթ ընտրությունում հաղթանակ է տանում Ֆրիդրիխ Մերցի պահպանողական Քրիստոնյա-դեմոկրատական միության (CDU) և Քրիստոնյա-սոցիալական միության (CSU) դաշինքը՝ ձայների գրեթե 29 տոկոսով, հայտնում է ZDF-ը՝ վկայակոչելով exit poll-ի տվյալները:
Երկրորդ տեղում է Ալիս Վայդելի ծայրահեղ աջ «Այլընտրանք Գերմանիայի համար» (AfD) կուսակցությունը՝ ռեկորդային 20 տոկոսով, երրորդ հորիզոնականում Գերմանիայի Սոցիալ-դեմոկրատական կուսակցությունն (SPD) է՝ կանցլեր Օլաֆ Շոլցի գլխավորությամբ, որը ստացել է ձայների 16,5%-ը՝ ցուցաբերելով «պատմական վատ» արդյունք:
Սոցիալ-դեմոկրատական կուսակցությանը հաջորդում են «Կանաչները»՝ 12%-ով ու «Ձախ կուսակցությունը»՝ 9%-ով:
ZDF-ի հաղորդմամբ՝ ընտրության մասնակցությունը եղել է ամենաբարձրը 1990-ին Գերմանիայի վերամիավորումից ի վեր՝ կազմելով 83 տոկոս:
Կարդացեք նաև
Հավանաբար Քրիստոնյա-դեմոկրատական միություն/Քրիստոնյա-սոցիալական միությունը (CDU/CSU) կձևավորի իշխող կոալիցիա: Այն կառաջադրի կանցլերի թեկնածուի, որը կդառնա Գերմանիայի կառավարության նոր ղեկավարը:
Խորհրդարանի կազմը կընտրվի 4 տարի ժամկետով: Այն կունենա նվազագույնը 598 պատգամավոր:
Գերմանիայի խորհրդարանի արտահերթ ընտրությունների վերաբերյալ «Լուսավոր Հայաստան» կուսակցության նախագահ, ՀՀ հատուկ հանձնարարություններով նախկին դեսպան Էդմոն Մարուքյանը ֆեյսբուքյան իր էջում, հրապարակելով հետևյալ լուսանկարը, գրել է․
Օրեր առաջ, Ֆրանսիայի նախագահ Մակրոնի հրավերով կայացած գագաթնաժողովի ժամանակ արված ԵՄ առաջնորդների այն վախվորած լուսանկարը մեկնաբանելով՝ կանխատեսեցի, որ լուսանկարում պատկերված բոլոր առաջնորդները հերթով պարտվելու են ազգային ընտրություններում։
Քիչ առաջ ԳԴՀ կանցլեր Շոլցը ընդունեց իր պարտությունը խորհրդարանական արտահերթ ընտրություններում։ Մյուսները նույն բախտին են արժանանալու, որովհետև իրենց ժողովրդի շահերը ստորադասել են այլ շահերին։
Մեր բարեկամ Մակրոնը մտահոգվելու պատճառ չունի՝ նա իր նախագահության երկրորդ ժամկետում է և կարող է բոլորին ճանապարհել:
