Արցախի պահեստազորի սպաների միության անդամները Հայրենիքի պաշտպանի օրն այցելեցին Եռաբլուր զինվորական պանթեոն։ 2015 թվականին Արցախի Հանրապետության Ազգային ժողովն օրենք է ընդունել եւ փետրվարի 23-ը պաշտոնապես հռչակել Հայրենիքի պաշտպանի օր։
«Այսօր պահեստազորի սպաների համար եւս մեկ առիթ է այցելելու Եռաբլուր՝ մեր որդիների, մարտական ընկերների, ավագ եղբայրների շիրիմներին հարգանքի տուրք մատուցելու։ Եռաբլուր այցելելու խորհուրդը կայանում է նրանում, որ նորից մենք ոգեւորվում ենք, պարտավորվում ենք մեր նահատակված ընկերների առաջ՝ շարունակելու պայքարը՝ հանուն Տրապիզոնից մինչեւ Ջուլֆա, Կեսարիայից մինչեւ Գանձակ Հայաստան»,- «Առավոտի» հետ զրույցում ասաց Արցախից բռնի տեղահանված պահեստազորի սպաներից մեկը։
Հարցին, որ այսօրվա իշխանությունները փակում են Արցախի հարցը, ի՞նչ հնարավորություններ կան Արցախի վերադառնալու եւ ստեղծված իրավիճակը փոխելու, մեր զրուցակիցը պատասխանեց․ «Իշխանությունները գալիս գնում են, ժողովուրդը մնալու է, գաղափարը մնալու է, եւ այդ գաղափարը պետք է առաջ տանել։ Անկախ իշխանությունների դիրքորոշումից, մենք ունենք այն նվիրական գաղափարն ու կառույցները, որոնք ամեն ինչի վրայով անցնելու են, միայն թե ազգային-ազատագրական պայքարն իր սկզբունքային գաղափարախոսությունն ունենա»։
Հարցին, թե Արցախն ուժով վերցնելու հնարավորություն կա, նա պատասխանեց․ «Ռեսուրսներ ունենք, պարզապես մնում է գտնվի Վազգեն Սարգսյանի նման լիդերը, որի դրոշի տակ կարող ենք համախմբվել»։
Կարդացեք նաև
Մանրամասները՝ տեսանյութում
Ռոզա ՀՈՎՀԱՆՆԻՍՅԱՆ
