Դատարանն այսօր որոշեց մասնակի սահմանափակել հասարակական-քաղաքական գործիչ Էդգար Ղազարյանի խոսքի ազատությունը։ Էդգար Ղազարյանին մեղադրանք է ներկայացվել Քրեական օրենսգրքի 490-րդ հոդվածով՝ (դատավորի, դատախազի, քննիչի, քննչական մարմնի ղեկավարի, հետաքննության մարմնի, փաստաբանի, ներկայացուցչի, փորձագետի կամ հարկադիր կատարողի նկատմամբ սպառնալիքը կամ նրանց մասին տեղեկություն հրապարակելը կամ նրանց գույքը ոչնչացնելը կամ վնասելը կամ նրանց նկատմամբ բռնություն գործադրելը) հրապարակային քննադատական խոսքի համար։
Փաստաբան Ռուբեն Մելիքյանը լրագրողներին ասաց․ «Դատարանը բավարարեց բողոքը, բայց, բարեբախտաբար, մասնակի։ Մեր մտավախությունները իրականություն դարձան, որ սա ուղղված էր Էդգար Ղազարյանի խոսքի ազատությունը սահմանափակելուն։ Սահմանափակվեց Էդգար Ղազարյանի խոսքի ազատությունը, բայց դատարանը հստակեցրեց իր որոշմամբ, որ դա վերաբերում է այն խոսքին, որը վերաբերում է դատավորներին, դատախազներին, քննիչներին, փաստաբաններին եւ հարկադիր կատարողներին ու նրանց ընտանիքի անդամներին։ Օրինակ՝ մեզ չպարզաբանվեց՝ Բաքվի դատարանների դատավորներին դա վերաբերում է, թե՞ ոչ»։
Մանրամասները՝ տեսանյութում
Կարդացեք նաև
Ռուբեն Մելիքյանն ասաց, որ որոշումը բողոքարկելու են, ակնկալում են, որ Վերաքննիչ դատարանում ունենալու են հաջողություն։
«Դե հիմա այս որոշումից հետո այդ մարդիկ թող բռնվեն, հիմա այնքան դիմումներ են ստանալու նախկին հայտարարությունների հետ կապված։ Էդգար Ղազարյանը ցիտել է Փաշինյանի խոսքերը՝ Սահմանադրական դատարանի եւ բուտկային հետ կապված։ Այն, որ Նիկոլ Փաշինյանը Սահմանադրական դատարանը անվանում է բուտկա, հիմա Էդգար Ղազարյանին դրա համար մեղադրանք են առաջադրել։ Մենք ասում ենք՝ մարդը ցիտատ է բերել։ Հիմա այդ ցիտատի հեղինակի խոսքը ստիպված կլինեն քննարկել, շատ հետաքրքիր օրեր են սպասվում»,- նշեց նա։
Մանրամասները՝ տեսանյութում
Ռոզա ՀՈՎՀԱՆՆԻՍՅԱՆ
