Հրապարակային քննադատական խոսքը լռեցնելու նպատակով Էդգար Ղազարյանի նկատմամբ քրեական հետապնդում նախաձեռնելու առիթով քաղաքական գործչի պաշտպանությունը ամբողջ կազմով ստանձնած «Հինգ իրավապաշտպանների նախաձեռնության» անդամ, փաստաբան Վարազդատ Հարությունյանը Aravot.am-ին ասաց. «Գործն ակնհայտորեն միտված է Էդգար Ղազարյանի քաղաքական եւ հասարակական գործունեությունը, որ դրսեւորվում է հրապարակային ելույթներով, խոչընդոտելուն, սահմանափակելուն: Խափանման միջոցի միջնորդությունը վարչական հսկողությունն է, որի նպատակը Էդգար Ղազարյանի կողմից հանրային, քաղաքական ելույթներում ցանկացած անձի նկատմամբ քննադատական որեւէ խոսք արտահայտելը սահմանափակելն է, ինչը, բնականաբար, չի տեղավորվում ժողովրդավարական հասարակության մեջ խոսքի ազատության սահմանափակման ընդունելի չափանիշների մեջ: Առկա է էական ճնշում, դրա համար սպասենք, տեսնենք»:
Աշոտ ՀԱԿՈԲՅԱՆ
