«ԱՄՆ-ն Ուկրաինայում պատերազմն ավարտելու համար երկու պատճառ ունի»: Aravot.am-ի հետ զրույցում այս մասին նշել է «ԱՊՐԻ Արմենիա» վերլուծական կենտրոնի ավագ փորձագետ Բենիամին Պողոսյանը:
«Առաջինը՝ ԱՄՆ-ին անհրաժեշտ են ռեսուրսների եւ ծախսերի նվազեցում Ուկրաինայում եւ Եվրոպայում, որպեսզի արդեն կարողանա կենտրոնանալ խաղաղօվկիանոսյան տարածաշրջանի վրա: Երկրորդը՝ ԱՄՆ-ն ցանկանում է կանխել Ռուսաստանի եւ Չինաստանի հարաբերությունների սերտացումը»:
Ըստ Պողոսյանի՝ Վաշինգտոնը կփորձի արդյունքի հասնել հնարավորին արագ ժամկետում, բայց հակամարտության կողմերը տարբեր դիրքորոշումներ եւ սպասելիքներ ունեն:
Ռուսաստանը պահանջում է իր վերահսկողության տակ գտնվող տարածքների ճանաչում ՌԴ կազմում, պատժամիջոցների չեղարկում: ԱՄՆ-ն կարող է զինադադարի դիմաց ռուսական որոշ պահանջներ բավարարել, որպեսզի կանխի ՌԴ-ՉԺՀ ինտենսիվ գործընկերությունը, բացատրում է մասնագետը:
Կարդացեք նաև
Բենիամին Պողոսյանը նաեւ շեշտեց՝ «Ռուսաստանը ցանկանում է տեսնել եվրոպական անվտանգության այնպիսի ճարտարապետություն, որտեղ ԱՄՆ-ի դերը գերակա չի լինի», ապա շարունակեց, «Եվրոպայի անվտանգային ճարտարապետության մեջ ՌԴ-ն ավելի մեծ ներգրավվածություն է ցանկանում»:
Ռուս-ուկրաինական պատերազմի ավարտի ժամկետների մասին Պողոսյանն ասաց՝ դա բանակցություններից է կախված:
«Ամեն դեպքում, դա արագ չի լինի, իսկ մինչեւ դա ինտենսիվ պատերազմը կշարունակվի»:
Ուկրաինական ռազմաճակատի հնարավոր փլուզում ամռանը կամ աշնանը
Բենիամին Պողոսյանին հարցրինք՝ եթե Միացյալ Նահանգները Ուկրաինային աջակցություն չտրամադրի, եվրոպական օգնությամբ ուկրաինական ուժերն ի զորո՞ւ են դիմակայել Ռուսաստանին:
«ԱՄՆ աջակցությունը հիմնականում կայանում է զենքի մատակարարման տեսքով, իսկ Եվրոպան ֆինանսապես է օգնում: Եթե ԱՄՆ-ն այլեւս զենք չմատակարարի, Եվրոպան կարող է զենք գնել ԱՄՆ-ից եւ տրամադրել այն Ուկրաինային, բայց այսպես Ուկրաինան կկարողանա դիմակայել առավելագույնը վեցից ինն ամիս, որից հետո ուկրաինական ռազմական ճակատը կարող է փլուզվել: Դրան մենք կարող ենք ականատես լինել 2025-ի աշնանը», – կանխատեսում է Պողոսյանը:
«Եթե այսօր ռուսական ուժերը մեկ շաբաթում մի քանի կիլոմետր են առաջացել, այդ դեպքում կարող են մեկ օրում տասից քսան կիլոմետր առաջանալ եւ գրավել խոշոր քաղաքներ, օրինակ՝ Խարկովը կամ Դնեպրը», – հավելում է «ԱՊՐԻ Արմենիա»-ի փորձագետը:
Ի՞նչ պետք է անի ՀՀ-ն, որպեսզի վնասներ չկրի
Հետաքրքրվեցինք՝ որքանո՞վ են տրամաբանված հայաստանյան ոչ-փորձագիտական շրջանակներում տարածվող թեզը, թե ՌԴ-ԱՄՆ համագործակցությունը բացասաբար է ազդելու Հայաստանի վրա:
Ըստ Պողոսյանի՝ հակամարտության հանգուցալուծմամբ՝ Ռուսաստանի ռեսուրսներն, այդ թվում՝ Հարավային Կովկասում, կընդարձակվեն:
«2025-ի ամռանը կամ աշնանը Ռուսաստանը ավելի մեծ ռեսուրսներ կունենա իր շահերը սպասարկելու համար», – ընդգծում է նա:
«Սա կարող է թե՛ օգտակար, թե՛ վնասակար լինել մեզ համար: ՀՀ-ն պետք է պատրաստվի այս փոփոխությանը: Շատ բան Հայաստանի վարած քաղաքականությունից եւ քայլերից է կախված: Եթե հայտարարենք՝ «Ռուսաստանը բարբարոս դիկտատորական պետություն է, որից Հայաստանը պետք է հեռանա» վնասներ կկրենք: Վերադարձ հայ-ռուսական նախկին հարաբերություններին անհնար է, բայց եթե ադապտացվենք այդ փոփոխություններին, կանխենք հայ-ռուսական հարաբերությունների հետագա վատթարացումը եւ ՌԴ-ի հետ նոր ստատուս քվո ձեւավորենք, կկարողանանք օգուտներ քաղել», – մեզ հետ զրուցում նշեց «ԱՊՐԻ Արմենիա» վերլուծական կենտրոնի ավագ փորձագետը:
Արսեն ԱՅՎԱԶՅԱՆ
