Փաստաբան Էրիկ Ալեքսանյանը, որը նախկին դատավոր Արուսյակ Ալեքսանյանի եւ նրա օգնական Թամարա Պետրոսյանի հետ անցնում է մեկ քրեական գործով, համացանցում գրառում էր կատարել այն մասին, որ պատրաստվում է մոտ ժամանակներս ավարտել իր գործունեությունը որպես փաստաբան:
Այսօր ՀԿԴ-ում սույն գործով դատական նիստի սկզբում, որի ժամանակ եզրափակիչ ելույթով պետք է հանդես գար Արուսյակ Ալեքսանյանի պաշտպան Առնոլդ Վարդանյանը, նախագահող դատավոր Վահե Դոլմազյանը քննարկման առարկա դարձրեց Էրիկ Ալեքսանյանի այդ որոշումը:
«Ես դեռեւս շարունակելու եմ աշխատել որպես փաստաբան: Ճիշտ է, ունեմ որոշակի տրամադրվածություն հետագայում դադար վերցնելու համար, բայց ունեմ շուրջ 40 քրեական վարույթներ, դրանցով պայմանավորված պատասխանատվություն եւ դրանք պետք է ավարտեմ: Ես ամբողջ կյանքում աշխատել եմ իմ պաշտպանյալների վիճակը թեթեւացնել, այլ ոչ թե վիճակ բարդացնել»,-հայտարարեց փաստաբանը` ի պատասխան դատավորի հարցադրման:
Դատավոր Վահե Դոլմազյանը պարզաբանեց, որ Էրիկ Ալեքսանյանը Ուկրաինայի քաղաքացի է, հետեւաբար, նման պայմաններում դատարանի համար հարցեր կարող են առաջանալ: Նա կարեւորեց նաեւ այն հանգամանքը, որ Էրիկ Ալեքսանյանը երբեմն շատ կատեգորիկ ու հանկարծակի հայտարարություններ է անում, ինչպես, օրինակ, փաստաբանական գործունեությունը դադարեցնելու որոշումը:
Կարդացեք նաև
«Կյանքն այնպիսին է, որ այսօր կարող եք ասել կոնկրետ մի բան եւ իրադարձությունների արդյունքում ձեր դիրքորոշումները կամ որոշումները փոխվեն: Եվ եթե դուք այսօր հայտարարում եք , որ փաստաբանությամբ չեք զբաղվելու, դատարանը դա կարեւորում է՝ հաշվի առնելով մի շարք հանգամանքներ»,-հայտարարեց Վահե Դոլմազյանը եւ հրապարակեց դատարանի որոշումը, ըստ որի՝ Էրիկ Ալեքսանյանի նկատմամբ կիրառված գրավ խափանման միջոցի հետ մեկտեղ համակցելով կիրառել այլընտրանքային միջոց՝ Հայաստանի Հանրապետությունից բացակայելու արգելքը եւ որոշումն ուղարկել իրավասու մարմին:
Աշոտ ՀԱԿՈԲՅԱՆ
