2024 թվականի մարտի 20-ին էլեկտրոնային եղանակով Երեւան քաղաքի առաջին ատյանի ընդհանուր իրավասության քաղաքացիական դատարանին է դիմել Անգին Ղուկասյանը: Հայցը արձակագիր, հրապարակախոս, հինգ տասնյակ գրքերի հեղինակ Բակուր Կարապետյանի դեմ է՝ պատվին, արժանապատվությանը պատճառված վնասի հատուցման մասին:
Կարապետյանը «Շուշի» բարեգործական հիմնադրամի հիմնադիրն էր, բանասիրական գիտությունների պատվավոր դոկտոր, որը շնորհել է ԱՄՆ Գիտությունների համահայկական միջազգային ակադեմիան:
Հայցադիմումը նախ դատավոր Վահագն Թորոսյանի վարույթում ընդունվեց, ապա դատավոր Է.Ամալյանի վարույթ:
2024թ. օգոստոսի 6-ին հայցվոր Ղուկասյանը հայցի առարկան փոխելու վերաբերյալ միջնորդություն է անում, որը դատարանը դեկտեմբերի 12-ին բավարարում է, արձանագրելով, որ քանի դեռ ապացուցման պարտականությունը չի բաշխվել, մերժելու հիմքեր չկան: Հայցվորը ապա դիմում է դատարան՝ պետական տուրքի տարաժամկետման միջնորդությամբ՝ նշելով, որ գտնվում է ծանր ֆինանսական պայմաններում, աշխատավարձը կազմում է 100.000 ՀՀ դրամ, որի 30%-ն ուղղվում է մինչ օրս գոյացած պարտքերի մարմանը, քանի որ ունի գումարի բռնագանձման բազմաթիվ կատարողական վարույթներ: Դատարանի որոշմամբ պետական տուրքի վճարումը հետաձգելու վերաբերյալ միջնորդությունը մերժվում է, իսկ հայցադիմումը` վերադարձվում այն պատճառաբանությամբ, որ. «(…) Տվյալ դեպքում հայցվոր Անգին Ղուկասյանի կողմից չեն ներկայացվել վերջինիս գույքային դրությունը արտացոլող, անհրաժեշտ եւ բավարար ապացույցներ պետական տուրքի վճարումը հետաձգելու վերաբերյալ միջնորդությունը բավարարելու համար: Մասնավորապես, միջնորդությանը կից ներկայացված չէ որեւէ ապացույց, որով կհիմնավորվեր՝ հայցվորի ֆինանսական ծանր վիճակը կամ հայց հարուցելու համար օրենքով սահմանված կարգով եւ չափով պետական տուրք վճարելու համար անհրաժեշտ ֆինանսական միջոցների անբավարարությունը (…) »: Ըստ հայցվորի, «պատասխանողի հրապարակած նյութում տեղ գտած արտահայտությունների բովանդակությունից երեւում է, որ դրանք իրենցից ներկայացնում են կոնկրետ, հստակ տեղեկություններ հայցվորի անձի վերաբերյալ, այսինքն, պատասխանողը հայցվորին ներկայացնում է գործարար, կոռումպացված անձ, խարդախ, խաբեբա, գումարներ հավաքող»:
Կարդացեք նաև
Նրան վիրավորանքի եւ զրպարտության մասին հայտնի է դարձել «Ֆեյսբուք» սոցիալական ցանցից. «Այն հասանելի է եղել նաեւ երրորդ անձանց, այնպիսի լսարանի առաջ, որտեղ առկա են անսահմանափակ թվով երրորդ անձինք»:
Ա. Ղուկասյանը պահանջում է, որպեսզի Բ. Կարապետյանը իրենից հրապարակային ներողություն խնդրի, «Ֆեյսբուք» սոցիալական ցանցի իր անձնական էջում:
Դատական նիստը նշանակվել է փետրվարի 27-ին:
Ռուզան ՄԻՆԱՍՅԱՆ
«Առավոտ» օրաթերթ
20.02.2025
