«1988 թվականի փետրվարի 20-ին մենք Բաքվի բանտերում գերիներ չունեինք, եւ չունեինք այնպիսի հասարակություն, որն անտարբեր է»,- Ազատության հրապարակում հրավիրած հանրահավաքում ասաց «Միասին» շարժման համահիմնադիր Նարինե Դիլբարյանը։
«Երեկ երկու ուղերձ հրապարակվեց մամուլում՝ մեկը Նիկոլ Փաշինյանի ուղերձն էր, որի միտքը հետեւյալն էր՝ հերթական զիջումը՝ ՀՀ Սահմանադրության փոփոխությունը։ Իսկ մենք գիտենք, որ դա Իլհամ Ալիեւի հիմնական պահանջն էր։ Հայտարարվեց եւ արդեն ազդարարվեց, որ Հայաստանի այս Հանրապետությունն իրենք փաստորեն փորձում են լուծարել։ Բայց դրա հետ մեկտեղ հրապարակվեց այն ուղերձը, որը Ռուբեն Վարդանյանը Բաքվի բանտից հղել էր։
Եվ դա միայն Ռուբեն Վարդանյանի ուղերձը չէր, դա Բաքվի բանտերում շինծու դատավարությունների ու խոշտանգումների ներքո չկքող հայորդիների ուղերձն էր։ Ռուբեն Վարդանյանը ձեւակերպել է հետեւյալ խոսքը, որը մեր բոլորի համար է, որ այնտեղ՝ Բաքում դատում են ոչ միայն իրեն, այլ մի ամբողջ ժողովրդի, բոլոր այն մարդկանց, որոնք օգնել են Արցախին ու մասնակցել են Արցախյան ազատամարտին»,- ասաց Դիլբարյանը։
Կարդացեք նաև
Նա հավելեց, որ Բաքվում պահվող գերիներին ազատ արձակելու պահանջով պահանջով դիմելու են Մինսկի խմբի համանախագահ պետություններին եւ միջազգային հանրությանը։
Ռոզա ՀՈՎՀԱՆՆԻՍՅԱՆ
