Գյումրին 12 տարի կառավարած նախկին քաղաքապետ, Գյումրու ՏԻՄ ընտրություններին մասնակցելու հայտ ներկայացրած Վարդան Ղուկասյանին և նրա թիկնապահին ձերբակալել են տան դիմացից: Նա պատրաստվել է գնալ իր գրասենյակ, որն իր տնից հեռու չէ։ Այս մասին մեզ փոխանցեցին անակնկալի եկած հարազատները։ Նրանք զարմացած են ոստիկանության տարածած հաղորդագրությունից, թե Ղուկասյանի մոտ կարող էր զենք լինել։ Նրանք պնդում են, որ կան տեսախցիկներ։
ՆԳՆ-ն հաղորդել է, որ 2 անձ ձերբակալվել է ապօրինի զենք-զինամթերք կրելու և պահելու կասկածանքով։ Նրանք տեղափոխվել են Քրեական ոստիկանության Շիրակի բաժանմունք։
Հարազատները զայրացած են, որ առանց ծանուցման ձերբակալել են։
Կարդացեք նաև
Գյումրու նախկին փոխքաղաքապետ Գագիկ Մանուկյանը սա կապում է ընտրությունների հետ` քաղաքական ենթատեքստ տեսնելով։ Ըստ նրա, հետազոտության արդյունքը ցույց են տվել, թեկնածուներից առաջին տեղում Վարդան Ղուկասյանն է, սա էլ պատճառ է դարձել ռեպրեսիաների։ Գագիկ Մանուկյանը համոզված է, որ այս պատմությունը մեծ աղմուկ կհանի։
Գագիկ Մանուկյանի ասելով` սա լավ նախադեպ չէ, ժողովրդավարական երկրի համար անհանդուրժելի է։
Ոստիկանության մարզային վարչության դիմաց մեծ թվով մարդիկ են հավաքված, Վարդան Ղուկասյանի շահերի ներկայացուցիչ փաստաբան Արամայիս Հայրապետյանը, որին սկզբում չեն թողել ներս մտնի, այժմ ներսում է։
Նունե ԱՐԵՎՇԱՏՅԱՆ
