ԱՄՆ ազգային անվտանգության նախկին խորհրդական Ջոն Բոլթոնը քննադատել է Դոնալդ Թրամփի՝ Ուկրաինայի և Վլադիմիր Զելենսկու մասին արված հայտարարությունները՝ դրանք համարելով «ամոթալի»:
«Թրամփի արտահայտությունները Զելենսկու և Ուկրաինայի մասին երբևէ արված ամենաամոթալի խոսքերից են ԱՄՆ նախագահի կողմից։ Մեր աջակցությունը Ուկրաինային երբեք բարեգործություն չի եղել․ մեր սեփական կենսակերպը կախված է մեր ուժից արտասահմանում»,- գրել է Բոլթոնը իր X (նախկին Twitter) միկրոբլոգում։
Թրամփն ավելի վաղ հարցականի տակ էր դրել ԱՄՆ-ի շարունակական ռազմական ու ֆինանսական աջակցությունը Ուկրաինային՝ նշելով, որ եվրոպական երկրներն ավելի քիչ ներդրում են կատարում, քան Միացյալ Նահանգները։
«Ես սիրում եմ Ուկրաինան, բայց Զելենսկին սարսափելի աշխատանք է կատարել, նրա [ղեկավարած] երկիրը փլուզվել է, և միլիոնավոր մարդիկ անտեղի մահացել են, և այդպես շարունակվում է…»,- սոցհարթակում գրել է նախագահ Դոնալդ Թրամփը։
Կարդացեք նաև
Նա Զելենսկուն անվանել է «համեստ հաջողություններով կատակերգու», որը «համոզել է Ամերիկայի Միացյալ Նահանգներին ծախսել 350 միլիարդ դոլար, պատերազմի մեջ մտնել, որը հնարավոր չէր հաղթել, որը երբեք չպետք է սկսվեր, բայց պատերազմ, որը նա, առանց ԱՄՆ-ի ու Թրամփի երբեք չի կարողանա կարգավորել»:
Դոնալդ Թրամփը հավելել է, որ «միակ բանը, ինչի մեջ նա՝ [Զելենսկին] լավ էր, Բայդենի հետ խաղալն էր, ինչպես ջութակի վրա են նվագում»՝ ավելի շատ ռազմական օգնություն ստանալու համար:
Բոլթոնը, որը նախկինում հաճախ է քննադատել Թրամփի արտաքին քաղաքականությունը, ընդգծել է, որ Ուկրաինայի պաշտպանությունը կարևոր նշանակություն ունի ոչ միայն Եվրոպայի, այլև ԱՄՆ-ի անվտանգության համար։
