«Դա հերյուրանք է, ես ոչ մի պաշտոնավոր մարդու հետ ազգակցական կապ չունեմ։ Եթե նրանք ինձ տեսնեն, ոչ ես նրանց կճանաչեմ, ոչ իրենք»,- վստահեցրեց Երևանի Շենգավիթ վարչական շրջանի թիվ 144 դպրոցի տնօրեն Արմինե Պողոսյանը՝ անդրադառնալով այն հարցին՝ արդյոք ինքը Վեդի համայնքի ղեկավար Գարիկ Սարգսյանի հետ ազգակցական կապի մե՞ջ չէ։
Նշենք՝ Երևանի ավագանու «Մայր Հայաստան» խմբակցության անդամներ Սոնա Աղեկյանն ու Աշոտ Սարգսյանն այցելել էին դպրոց, որպեսզի տնօրենից պարզաբանում ստանան, թե ինչու է աշխատանքից ազատել 1-ին դասարանի դասվար Վարդուհի Խաչատրյանին։
Սակայն դպրոցի տնօրենը սկզբում չցանկացավ նրանց հետ զրուցել, նաև պահակներին հրահանգեց դպրոցի դուռը փակել։ Ավագանու անդամ Աշոտ Սարգսյանն ասաց․ «Առաջին դասարանի աշակերտների 40-ից ավելի ծնողներ դիմել են մեզ այն խնդրով, որ իրենց ուսուցչին հեռացրել են աշխատանքից։ Ծնողները պնդում են, որ անհիմն կերպով են նրան հեռացրել։ Ավագանու անդամներով փորձեցինք առանց ծնողների՝ տնօրենի հետ հանդիպում ունենալ, բայց նա խուսափում է»։
Կարդացեք նաև
Ավագանու անդամ Սոնա Աղեկյանն էլ հայտարարեց․ «Արձանագրենք, որ այս պահին դպրոցի դուռը փակ է։ Ցանկացել ենք լսել նաև տնօրենի կարծիքը։ Ահազանգել ենք ոստիկանություն և Երևանի քաղաքապետարանի հանրակրթության վարչություն»։
Երբ ոստիկանները եկան, ավագանու անդամները նրանց հետ մի կերպ ներխուժեցին դպրոց։
Ի վերջո` դպրոցի տնօրենը դուրս եկավ միջանցք։ Նրան հարցրին՝ ինչո՞ւ եք ազատել տիկին Խաչատրյանին․ 44 ծնող պահանջում է դասվարի վերադարձը։ Արմինե Պողոսյանը պատասխանեց․ «Հարգելիներս, ես հիմա իրավասու չեմ, դատական գործընթաց է տեղի ունենալու, Վարդուհի Խաչատրյանը դիմել է դատարան, վարույթ է հարուցվել, դատական գործընթացը ցույց կտա։ Դատախազության կողմից միջնորդագիր է ստացել Երևանի քաղաքապետարանը, և դիմել են ինձ՝ որպես գործատուի։ Այդ գրությունը փետրվարի 3-ին եմ ստացել։ Ամեն ինչ դատախազությանն է վերաբերում, և ես իրավասու չեմ այդ ամենը բարձրաձայնելու»։
Ավագանու անդամները նշեցին՝ դպրոցի տնօրենի անունը կապում են նաև Երևանի քաղաքապետ Տիգրան Ավինյանի հետ։ Նա պատասխանեց․ «Ոչ, նման բան չկա։ Դա հերյուրանք է։ Ոչ մի բարեկամ, ծանոթ չունեմ քաղաքապետարանում»։ Հարցին՝ Տիգրան Ավինյանի հովանավորությունը վայելո՞ւմ եք, թիվ 144 դպրոցի տնօրենն այսպես պատասխանեց․ «Ես ոչ Ավինյանի ազգականն եմ, ոչ էլ երբևէ հանդիպել ու ճանաչում եմ նրան»։
Տաթև ՀԱՐՈՒԹՅՈՒՆՅԱՆ
Արմինե Պողոսյանի լուսանկարը՝ ֆեյսբուքյան էջից
