«2024թ. դեկտեմբերի 4-ին ընդունվել է Աշխատանքային օրենսգրքում փոփոխությունների նախագիծը: Այս տարվա հուլիսի 1-ից ուժի մեջ է մտնելու կամավորության սկզբունքով, իսկ 2026թ հունվարի 1-ից լինելու է պարտադիր: 2026թ հունվարի 1-ից առնվազն պարտադիր բոլոր աշխատանքային պայմանագրերը, բացառությամբ որոշ դեպքերի, կնքվելու են էլեկտրոնային թվային համակարգով»,- «Արմենպրեսի» մամուլի սրահում կայացած ասուլիսում հայտնեց ՀՀ աշխատանքի և սոցիալական հարցերի նախարարության աշխատանքի և զբաղվածության վարչության պետ Ժորա Սարգսյանը՝ խոսելով աշխատանքային պայմանագրերի կնքման թվային համակարգի ներդրման մասին:
Ժորա Սարգսյանի խոսքով. «Լինելու է պորտալ, որտեղ մուտք են գործելու բոլոր գործատուները, ամեն ինչ իրականացվելու է պետեկամուտների կոմիտեի էլեկտրոնային հարթակում: Այնտեղ հնարավորություն է լինելու ստեղծել աշխատանքային պայմանագիր: Գործատուները լրացնելու են պարտադիր դաշտերը, որոնք ընտրվել են այն սկզբունքով, որ այսօր էլ Աշխատանքային օրենսգրքի 84 հոդվածում կան մի շարք պահանջներ, որ պետք է աշխատանքային պայմանագիրը բովանդակի: Այն պայմանագրերը, որ կնքվում են թղթային եղանակով, նույն սկզբունքով այլեւս կկնքվեն արդեն էլեկտրոնային համակարգում:
Բացի պարտադիր դաշտերը, որ գործատուն լրացնում է, նա ունի հնարավորություն աշխատողի հետ համաձայնությամբ ավել պայմաններ էլ նշել պայմանագրում, եթե դրա կարիքը տեսնում է: Գործատուն եւ աշխատողը կարող են իրենք որոշել՝ այդ ավել պայմանները լինեն էլեկտրոնային համակարգո՞ւմ, թե՞ ամրագրվեն առանձին համաձայնագրերի միջոցով: Այսինքն՝ հարթակում ներկայացվելու է միայն պարտադիր տեղեկատվությունը, մնացածն իրենք են որոշելու՝ ներկայացնել, թե ոչ: Օրինակ, կարող են նշել հարթակում, որ իրավունքներն ու պարտավորությունները սահմանվել են առանձին համաձայնագրերով, որը կարող է հարթակում չերեւալ»:
Մանրամասն՝ տեսանյութում.
Կարդացեք նաև
Գոհար ՀԱԿՈԲՅԱՆ
