«Մենք չենք ունեցել եւ մինչեւ այսօր չունենք կոնցեպտ՝ ԼՂՀ հիմնահարցի վերաբերյալ, որով հանդես կգայինք միջազգային հանրության առջեւ»,- «Արցախ. Ցեղասպանություն, գաղթ, գոյապայքար» թեմայով գիտաժողովի ժամանակ այսօր ասաց Հայաստանի դեմոկրատական կուսակցության նախագահ Արամ Սարգսյանը։
Նա նշեց, որ եթե Մինսկի խմբի համանախագահությունը չի գործում այսօր, եւ դա ողջունվում է Բաքվի ու նաեւ ՀՀ իշխանության կողմից, դա նշանակում է, որ մենք մեզ իսկապես դրել ենք «զավթիչ» եւ «ահաբեկիչ» որակումների տակ։ «Եթե մենք չենք ընդունում, որ Արցախի ժողովուրդը վարել է իր ազգային ազատագրական պայքարը, որը նույնպես միջազգային իրավունքի նորմ է, ապա դա նշանակում է, որ, այո, այդ դեպքում մենք ընդամենը նրանց տարածքում փորձել ենք իրականացնել զավթիչ գործողություններ։ Սա ամենամեծ հանցանքն է, որը կատարվում է այսօր։ Զրոյացնելով նախկին ամբողջ գործընթացը՝ լավ, թե վատ, ՀՀ իշխանությունները համարում են, որ ԵԱՀԿ Մինսկի խմբի ձեւավորումը նույնպես անօրինական էր»,- նշեց նա։
Արամ Սարգսյանի խոսքով՝ «Միացում» գաղափարից ՀՀ իշխանությունները շեղվեցին։ Մենք ունեինք եզակի հնարավորություն՝ միասնությունը, հակառակ դեպքում երկու հայկական պետություն ստեղծելը ցնորված գաղափար է, չէր կարող այդպիսի բան լինել։
Արամ Սարգսյանը հավելեց, որ հայ ժողովուրդը չի համակերպվելու, անպայման պետք է ապահովվի արցախցիների վերադարձը դեպի Արցախ։
Կարդացեք նաև
Մանրամասները՝ տեսանյութում
Ռոզա ՀՈՎՀԱՆՆԻՍՅԱՆ
