Սյունիքի մարզի ընդհանուր իրավասության դատարանը, դատավոր Արթուր Ոսկանյանի նախագահությամբ, որոշեց փոխել ՀՀ զինված ուժերի գլխավոր շտաբի պետի նախկին տեղակալ, գեներալ-լեյտենանտ, Ազգային հերոս Տիրան Խաչատրյանի խափանման միջոց կալանքը: 10 միլիոն գրավի դիմաց Տիրան Խաչատրյանի նկատմամբ դատարանը կիրառեց խափանման միջոցների համակցություն եւ բացակայելու արգելք:
Պաշտպանական կողմն այսօր միջնորդել էր փոխել խափանման միջոց կալանքը՝ հայտնելով, որ պատրաստ են 10 միլիոն դրամ գրավ ներկայացնել խափանման միջոցի փոփոխության համար:
Հիշեցնենք, որ Խաչատրյանին մեղադրանք է առաջադրվել 44-օրյա պատերազմի օրերին՝ ռազմական դրության ընթացքում, իր ծառայողական պարտականությունների կատարման նկատմամբ իբրև անփույթ վերաբերմունքի համար, որն առաջացրել է ծանր հետևանքներ: Տիրան Խաչատրյանը մեղադրանքը չի ընդունում։
Կարդացեք նաև
Նրա պաշտպան Արմեն Անդրիկյանն էլ լրագրողների հետ զրույցում, մինչեւ դատարանի որոշումը, ասաց, որ 5 տարի շարունակ իրականացվում է նախաքննություն, Խաչատրյանը բազմաթիվ անգամներ հարցաքննվել է ու դրսեւորել պատշաճ վարքագիծ: Ակտիվ քննչական գործողությունների համար է ձերբակալվել ու կալանավորվել, բայց իրենք ականատես չեն եղել ակտիվ քննչական գործողությունների, ընդամենը մի քանի առերեսում է եղել:
«Բացի այդ վաղեմության ժամկետներն անցնելու մոտ են այս քրեական գործով, իսկ այդ դեպքում կալանավորման հիմքերը պետք է լինեն ոչ թե կանխատեսելի բնույթի, այլ հստակ հիմք ներկայացվի: Նման հիմք առկա չէ»,- ասաց փաստաբանը:
Արփինե ՍԻՄՈՆՅԱՆ
Լուսանկարը՝ Գեղամ Մանուկյանի ֆեյսբուքյան էջից
