«Ամերիկայի ձայն». Տեխնոլոգիական հսկան անցնում է ռազմական նպատակներով արհեստական բանականության զարգացման ծրագրերին։
Google-ը հայտարարել է, թե հրաժարվում է իր քաղաքականությունից, ըստ որի չի զբաղվելու ռազմական նպատակներով կիրառվող արհեստական բանականության մշակմամբ։
«Չարիք մի՛ գործիր» սկզբունքով հիմնադրված տեխնոլոգիական հսկան՝ Google-ը,
տարիներ շարունակ իր կայքում հրապարակում էր պարտավորություն, ըստ որի չի մշակելու սպառազինություն և այնպիսի տեխնոլոգիաներ, որոնք կարող են կիրառվել լրտեսման համար:
Կարդացեք նաև
Սակայն անցած շաբաթ նշված պարտավորությունը հեռացվել է արհեստական բանականությանը վերաբերող ընկերության հայտարարած սկզբունքների բաժնից:
Google-ը, որի սեփականատեր-ընկերությունը, ինչպես հայտնի է, Alphabet-ն է, տակավին անպատասխան է թողել նշված փոփոխության վերաբերյալ հարցերը։
Փոխարենը Google-ի ղեկավարության կողմից վարվող բլոգում նշված է.
«Ընթանում է գլոբալ մրցակցություն արհեստական բանականության ոլորտում առաջնորդության համար՝ բարդացող աշխարհաքաղաքական լանդշաֆտի շրջանակներում: Կարծում ենք, որ ժողովրդավարական [երկրները] պետք է առաջ տանեն արհեստական բանականության զարգացումը»:
Որոշ դիտորդներ նման քայլը համարում են ապացույց, որ ընկերությունն այժմ բացահայտ կերպով առաջ է տանում իր մշակած և արհեստական բանականությանը վերաբերող տեխնոլոգիաները՝ այն ռազմական նպատակով օգտագործելու համար:
Այսօր արհեստական բանականությունն ավելի ու ավելի շատ է օգտագործվում մարտադաշտերում՝ Ուկրաինայից մինչև Գազա, և այդ ֆոնին՝ Սիլիկոնյան հովտի տեխնոլոգիական ընկերությունները, որոնք ժամանակին հակված չէին, որպեսզի իրենց մշակած գործիքներն օգտագործվեն ռազմական նպատակներով, աստիճանաբար հետ են կանգնում նման մոտեցումից:
Ինչպես հայտնի է, Open AI-ը, Meta-ն և Anthropic-ը ունեն արհեստական բանականությանը վերաբերող նախագծեր ամերիկյան ռազմական ոլորտի ձեռնարկությունների, գործակալությունների հետ:
Արհեստական բանականությունը օգտագործվում է, օրինակ, անօդաչուների հարվածների թիրախները որոշելու համար, և որոշ դեպքերում այն վերածվում է լիովին ինքնավար զենքի:
Արհեստական բանականության ոլորտում առաջատար հետազոտող Ստյուարտ Ռասելը, որը դեմ է նման՝ ինքնավար սպառազինությանը, մասնակցում էր օրերս Փարիզում կայացած AI Action Summit-ին:
«Ուկրաինայում պատերազմի ընթացը գնալով ավելի շատ է ուղղորդվում հեռակառավարվող անօդաչուների կամ լիովին ինքնավար անօդաչուների կիրառմամբ: Սա արմատական փոփոխություն է: Բազմաթիվ ռազմական ստրատեգներ կարծում են, որ առանց նման հնարավորությունների, դուք պարզապես չեք կարող կռվել ժամանակակից պատերազմում»,- ասում է Ռասելը։
Google-ի կապը ամերիկյան ռազմուժի հետ նորություն չէ։ 2017 թվականին, չնայած ընկերության հայտարարած սկզբունքներին, այն օգնեց ստեղծել թիրախավորող համակարգ, որը կոչվում է Project Maven և նախատեսված էր ԱՄՆ պաշտպանության նախարարության համար:
Մեկ տարի անց, հազարավոր աշխատակիցների բողոքից հետո, Google-ը դադարեցրեց պայմանագիրը:
Քննադատների խոսքով՝ Project Nimbus-ը, որը ամպային հաշվողական ծառայություններ է մատուցում, արժեցել է 1,2 միլիարդ դոլար և Իսրայելի կառավարության պատվերով ստեղծվել է Google-ի ու Amazon-ի կողմից, օգտագործվել է Գազայում ռազմական գործողությունների ժամանակ՝ լրտեսման և թիրախավորման համար:
Ռասելի ու ոլորտի այլ ներկայացուցիչների համար Google-ի քաղաքականության փոփոխությունը մտահոգիչ է:
«Պատահական չէ, որ քաղաքականության այս փոփոխությունը գալիս է նոր [ամերիկյան] վարչակազմի հետ, որը չեղարկել է արհեստական բանականության վերաբերյալ բոլոր կանոնակարգերը, որոնք սահմանվել էին Բայդենի վարչակազմի կողմից, և այժմ մեծ ուշադրություն է դարձնում արհեստական բանականության օգտագործմանը ռազմական հզորության ամրապնդման համար»,- ասում է Ռասելը:
Ինչևէ, փաստն այն է, որ արհեստական բանականության արագ զարգացմանը զուգահեռ՝ աճում է կառավարությունների ու բիզնեսի անհանգստությունը, որպեսզի հետ չմնան մրցակիցներից։
