«Թեպետ հայցերն այս պահին հասանելի չեն, բայց հնարավոր պատասխանատվության վկայակոչման տեսանկյունից իրավական դաշտում ես մեծ վտանգ չեմ տեսնում Հայաստանի համար»,- «Առավոտի» հետ զրույցում ասաց միջազգային իրավունքի մասնագետ Արա Խզմալյանը՝ անդրադառնալով Ադրբեջանի կողմից Հաագայի արբիտրաժային դատարան ընդդեմ Հայաստանի ներկայացրած հայցին:
Նշենք, որ Ադրբեջանը պահանջում է Արցախի տարածքում «ամբողջական փոխհատուցում շրջակա միջավայրի և կենդանական աշխարհի զանգվածային ոչնչացման համար»:
Արա Խզմալյան
«Արդարադատության միջազգային դատարանում պետությանը որոշակի արարք վերագրելու համար սահմանված են վերագրման չափանիշներ՝ վերահսկողության մասով։ Եվ, իմ կարծիքով, Հայաստանի Հանրապետությունը վերահսկողության նման մակարդակ Արցախի տարածքում կատարվող համապատասխան գործողությունների նկատմամբ չի ունեցել։ Այսինքն՝ Հայաստանը չի ուղղորդել կամ վերահսկել Կաշենի կամ Դրմբոնի հանքավայրերի շահագործումը կամ այլ գործողություններ, դա արվել է Արցախի իշխանությունների կողմից»,- ասաց Արա Խզմալյանը։
Հայաստանի իշխանությունները հայտարարել են, որ պատրաստ են հրաժարվել Ադրբեջանի դեմ միջազգային դատարաններ ներկայացրած հայցերից։ Արա Խզմալյանն ասաց, որ Ադրբեջանի այս քայլը ցույց է տալիս, թե ինչ հետեւանք կունենա դա։ «Սա եւս մեկ անգամ ցույց է տալիս, որ այս հնարավոր հրաժարման մասին խոսակցությունները վնասից բացի, ուրիշ ոչ մի հետեւանք չեն առաջացնի Հայաստանի համար»,- նշեց նա։
Կարդացեք նաև
Ռոզա ՀՈՎՀԱՆՆԻՍՅԱՆ
Գլխավոր լուսանկարում՝ Արցախի նախկին նախագահ Արայիկ Հարությունյանը Կաշենի հանքավայրում. 02-ը օգոստոսի 2020 թ.
