«Հանուն Հանրապետության» կուսակցության նախագահ Արման Բաբաջանյանի ֆեյսբուքյան գրառումը
Մեծագույն հաճույք էր հանդիպել Իսպանիայի Թագավորության արտաքին գործերի, Եվրոպական միության և համագործակցության նախարար Խոսե Մանուել Ալբարես Բուենոյին։ Քննարկեցինք Հայաստանի եվրոպական ինտեգրման գործընթացը և դրա համատեքստում Իսպանիայի անելիքները՝ հատկապես մեր երկրի եվրոպական ձգտումներին աջակցելու տեսանկյունից։
Անընդհատ փոփոխվող աշխարհաքաղաքական պայմաններում կարևոր է, որ մենք միասին աշխատենք՝ ապահովելով Հայաստանի եվրոպական ուղու կայուն և անշեղ ընթացքը։ Նախարարը քաջատեղյակ էր Ժողովրդավարական ուժերի հարթակի Եվրաքվեի նախաձեռնած ստորագրահավաքի, ինչպես նաև նախօրեին Ազգային ժողովում ընդունված օրենքի մասին, որով, դրա վերջնական ուժի մեջ մտնելուց հետո, Հայաստանը կսկսի ԵՄ-ին անդամակցելու գործընթացը։ Նա վերահաստատեց Իսպանիայի լիակատար աջակցությունը Հայաստանի՝ ԵՄ-ին անդամակցելու գործնական քայլերին։
Ի դեպ, նախարար Ալբարես Բուենոն նշեց, որ հենց ինքը եղել է Իսպանիայի առաջին արտաքին գործերի նախարարն, ով պաշտոնական հանդիպում է ունեցել Հայաստանի գործընկերոջ՝ Արարատ Միրզոյանի հետ 2022 թվականի մայիսի 20-ին։ Նա նաև ընդգծեց, որ նախատեսում է 2025 թվականի առաջին կեսին այցելել Հայաստան՝ մեր երկրների համագործակցությունը նոր մակարդակի բարձրացնելու նպատակով։
Կարդացեք նաև
Այս հանդիպումը ևս մեկ անգամ հաստատեց, որ Հայաստանի եվրոպական ուղին ամուր է, և մեր եվրոպացի գործընկերները պատրաստ են աջակցել մեզ այս կարևոր ճանապարհին։
