«Երբ նայում ես, թե ինչ են անում իշխանությունները՝ չես կարող չընդունել, որ լավ է ունենալ այլընտրանքներ: Պատգամավորներից մեկն ասում էր՝ մեկ զամբյուղի մեջ պետք չէ բոլոր ձվերը պահել; Բայց խնդիրը հետեւյալն է՝ այլընտրանքները պետությունները ստեղծում են, ինչը ծանր երկարատեւ աշխատանք է, իսկ այս դեպքում երկրորդ այլընտրանքային զամբյուղը գոյություն չունի, իրենք ասում են՝ այս ձվերը, որ էս մի զամբյուղի մեջ են, պետք է տանենք հասցնենք այլ զամբյուղ, որը դեռ գոյություն չունի:
Քանի որ երկրորդ զամբյուղի կախվածությունը համարյա ամբողջությամբ լինելու է Թուրքիայից, դու ստեղծելու ես նոր կախվածություն Թուրքիա-Ադրբեջան տանդեմից, վտանգները շատ են մեծանում: Ես նույնիսկ տնտեսական մասով հիմա պատրաստ չեմ քննարկել, որովհետեւ տնտեսագետ չեմ, բայց ակնհայտ է, թե ինչ կախվածություններ մենք ունենք այսօր Ռուսաստանից»,- «Հայելի» ակումբում քաղաքագետ Արթուր Մարտիրոսյանը:
«Նայում ես երկրի իմպորտը, որը հասել է 13 մլրդի, ու պարզ է դառնում, որ այդտեղ համարյա ուղիղ կեսը ռուսական ոսկին է եւ քարերը, որոնք մենք արտահանում ենք, էլ չեմ ասում, որ պատժամիջոցներով պայմանավորված՝ այս ամենը ուռճացված է: Իսկ եթե այդ ամենը հանենք, մնալու է մոտավորապես 2 մլրդ, ինչը նշանակելու է, որ մենք մոտավորապես ունենք 6 մլրդի ճեղքվածք: Արդյոք դա հնարավո՞ր է ինչ-որ ձեւով շատ արագ փոխարինել այլ երկրներով, այլընտրանքային լուծումները տալ: Իհարկե՝ ոչ: Հարց է ծագում՝ ուրեմն ինչո՞ւ են անում այս ամենը, ինչն է կարեւոր իշխանությունների համար:
Իրենք տեսան, որ կորցնում են վստահության տոկոսը, իսկ վերջին հարցումներն էլ ցույց են տալիս, որ իրենց իրական վստահությունը 10 տոկոսից էլ ցածր է, դրա համար իրենց պետք է մի նոր թեմա, որով կարողանան վերընտրվել, ԱԺ բերել իրենց գրպանային կուսակցություններին, իսկ այդ թեման եվրոպականն է:
Կարդացեք նաև
Ես զարմացած էի, որ ընդամենը 50 հազար ստորագրություն հավաքեց այդ խումբը, որովհետեւ եթե դուք փողոցում կանգնեցնեք որեւէ հայի, հարցնեք՝ ուզո՞ւմ է ինքը առանց վիզա ճամփորդել Եվրոպա, պատասխանը կլինի այո, եթե հարցնեք՝ ուզո՞ւմ է գնալ Եվրոպայում աշխատել, կասի՝ իհարկե ուզում է: Իշխանությունները փորձում են օգտվել հենց այս պահից: Իրենք այդ կուտը տալով՝ փորձում են կառչած մնալ աթոռներից»,-հավելեց Արթուր Մարտիրոսյանը:
Գոհար ՀԱԿՈԲՅԱՆ
