-Խոսում եք բանակցային գործընթացից, ասում եք՝ բանակցային գործընթացին ծանոթացել ենք Իլհամ Ալիեւից, նախկին նախագահներից ոչ մեկի հետ չեք խոսել: Ձեր ԱԳ նախարարին հարց եք տվել, էն մնացած ԱԳ նախարարները, որ կան, նրանց մի հատ հանդիպում կազմակերպե՞լ եք, չէ,՛ կարիքը չեք տեսնում: Ի՞նչ ունենք խոսելու, հենա կգնանք Ադրբեջանից կճշտենք էլի, արժե՞ նախկին նախագահների, նախկին ԱԳ նախարարների հետ խոսենք:
Կամ էսքան ասվում է, որ բանակցային որեւէ փուլում Արցախը ՀՀ մաս ճանաչելը չի եղել, բայց պարզվում է՝ եղել է:
Էդ ի՞նչ է ձեր թղթերի վիճակը, որ չեք կարողանում Քի Վեսթի թուղթը գտնեք ձեր արխիվներից, ցույց տաք: Խճճվել եք, ասում եք ՝ թուղթը չենք կարողանում գտնել,- այսօր ԱԺ-ում կառավարության հետ հարցուպատասխանի ժամանակ այս հարցերը Նիկոլ Փաշինյանին ուղղեց ԱԺ «Հայաստան» խմբակցության պատգամավոր Գառնիկ Դանիելյանը:
ԱԺ նախագահ Ալեն Սիմոնյանն ընդհատեց՝ հարցը ձեւակերպեք:
Կարդացեք նաև
-Ձեւակերպված է,- արձագանքեց Դանիելյանը:
Դանիելյանի հարցին արձագանքեց Նիկոլ Փաշինյանը. «Վերջին վեց ամիսներին ձեր խմբակցությունն անընդհատ մեզ ասում էր՝ հերիք է գնաք նախկիններին, մենք մի օր հավաքվեցինք, ասացինք՝ էս ժողովուրդը ճիշտ է ասում, հերիք է նախկին, նախկին: Եկեք փակենք այդ թեմաները, երբ այդ որոշումը կայացրել ենք, էլի մեզ տանում եք՝ էս ժամանակ էս եղավ, էս ժամանակ էս եղավ…վերադառնանք 2018 թվական, ապրիլի 17: Ես այս դահլիճում չեմ, այստեղից Սերժ Սարգսյանն ասում է հետեւյալը, էնքան չեմ ասել, հիմա արդեն մոռացել եմ: Ասում է՝ բանակցային գործընթացը լավատեսություն չի ներշնչում, որովհետեւ Ադրբեջանի ակնկալիքներն անընդունելի են մեզ համար, տեսա՞ք արձագանքը: Այդ հարցի պատասխանը դա է: Ուզում է 107 անգամ այդ հարցը տաք, այդ հարցն ուրիշ պատասխան չունի»:
Երբ ԱԺ դահլիճից եղան դիտարկումներ Սերժ Սարգսյանից պաշտոնը վերցնելու վերաբերյալ, Փաշինյանն արձագանքեց՝ «Սերժ Սարգսյանից չեմ ընդունել պաշտոնը, Կարեն Կարապետյանից եմ ընդունել պաշտոնը»:
Արփինե ՍԻՄՈՆՅԱՆ
