«Հարգելի տիկին Սարգսյան, քրեական ենթամշակույթի դեմ տարվող պայքարը ձախողվում է՝ դատաիրավական համակարգի որոշ ներկայացուցիչների ոչ բավարար ջանքերի կամ կաշկանդվածության պատճառով»,- ԱԺ-կառավարություն հարցուպատասխանի ժամանակ ՆԳ նախարար Արփինե Սարգսյանին դիմեց ՔՊ խմբակցության պատգամավոր Հայկ Սարգսյանը։ Նա հարցրեց՝ ի՞նչ աշխատանք է տարվում քրեական ենթամշակույթը մեր քաղաքացիների միջից արմատախիլ անելու համար։
Ի պատասխան՝ ՆԳ նախարար Արփինե Սարգսյանն անդրադարձավ այդ ուղղությամբ տարվող աշխատանքներին։ Նա ասաց, որ քրեական ենթամշակույթին վերաբերող օրենսդրական կարգավորման մեջ պետք է կատարեն փոփոխություններ, որպեսզի կարողանան կարգավիճակ ունենալը դիտարկել քրեական պատասխանատվության ենթակա։ Այսօր քրեական պատասխանատվություն է նախատեսված կարգավիճակ տալու, ստանալու, պահպանելու համար, սակայն կարգավիճակի գոյությունը չի դիտարկվում որպես քրեական պատասխանատվություն։
«Այս պահին վարչապետի հանձնարարականով մշակված է համապատասխան օրենսդրական նախաձեռնություն, որն առաջիկա օրերին կհանրայնացվի, որով կարգավիճակ ունենալն ինքնին կդիտարկվի որպես քրեական պատասխանատվության առարկա։ Սրանով կկարողանան որոշակի առումով փոփոխություն մտցնել պրակտիկայում»,- ասաց Արփինե Սարգսյանը։
Կարդացեք նաև
Մանրամասները՝ տեսանյութում
Ռոզա ՀՈՎՀԱՆՆԻՍՅԱՆ
