«Նիկոլ Փաշինյանն ընտրություններից առաջ ուզում էր ստանալ Ադրբեջանից խաղաղության փաստաթուղթ։ Կգնար, ընտրազանգվածին ցույց կտար, կասեր՝ հեսա խաղաղության պայմանագիրը։ Խոստացել էի։ Իրականությունը դասավորվեց այնպես, որ նույնիսկ այդ դատարկ թուղթը Ալիևը պատրաստ չէ ստորագրել։ Հետևաբար նման ֆարս է պետք մոգոնել»,-խորհրդարանում հայտարարեց ՀՀ ԱԺ «Հայաստան» խմբակցության պատգամավոր Աննա Գրիգորյանը՝ անդրադառնալով ԵՄ-ին ՀՀ-ի անդամակցելու գործընթացի մեկնարկի մասին oրենքի նախագծին։
Աննա Գրիգորյանը նաև նկատեց․ «ՀՀ-ն այս իշխանության օրոք է հայտնվել ԵՄ ավիացիոն սև ցուցակում, ՀՀ-ն ամբողջովին կախված է ԵԱՏՄ շուկայից։ Այս իշխանությունն արդեն յոթ տարի իշխանություն ունի և CEPA-ն 40 տոկոսով է իրականացրել։ Հիմա ասում են՝ մենք գնում ենք, ԵՄ անդամ դառնանք։ Ուղղակի ծիծաղելի է»։
Ըստ Աննա Գրիգորյանի՝ նաև աշխարհագրությունը պետք է հաշվի առնել․ «Մեր հարևան Վրաստանն ինչո՞ւ մինչև հիմա ԵՄ անդամ չէ։ Անդամակցության թեկնածություն ստացել է, ինչո՞ւ դեռ ԵՄ անդամ չէ։ Օդապարիկո՞վ ենք գնում ԵՄ։ Ի վերջո, աշխարհագրությունն իրենն ասում է, չէ՞»։
Մանրամասները՝ տեսանյութում
Կարդացեք նաև
Տաթև ՀԱՐՈՒԹՅՈՒՆՅԱՆ
