«Վիզաների ազատականացումը որևէ կապ չունի ԵՄ անդամակցության գործընթացի հետ»,- խորհրդարանում հայտարարեց ՀՀ ԱԺ ՔՊ խմբակցության պատգամավոր Արման Եղոյանը։
Անդրադառնալով ՀՀ ԱԺ «Պատիվ ունեմ» խմբակցության պատգամավոր Թագուհի Թովմասյանի այն հայտարարություններին, թե Նիկոլ Փաշինյանի իշխանության օրոք վիզաների ազատականացում չի լինի, Արման Եղոյանն արձագանքեց․ «Տիկի′ն Թովմասյան, վիզաների ազատականացման երկխոսության գործընթացի ամենակարևոր փուլն արդեն տեղի է ունեցել։ Դա երկխոսության մեկնարկն է։ 2026-ին չի լինելու, դա հիմա էլ կարող եմ ասել։ Իսկ 2026-ին ընտրություններ են։ Քանի որ բուն գործընթացը կարող է մի քանի տարի տևել և կապված է ոչ թե քաղաքական խնդիրների, այլ տեխնիկական խնդիրների հետ։ Արդեն այս կառավարությունն ամենակարևոր քաղաքական հարցը լուծել է։ Երկար ջանքերից հետո մեզ հաջողվեց համոզել բոլոր 27 երկրներին էս որոշումը տալ»։
Անդրադառնալով նախաձեռնության նախաբանի հետ կապված մտահոգություններին՝ Արման Եղոյանն ասաց․ «Ես առաջարկը ներկայացրել եմ լիազոր ներկայացուցչին։ Առանց նախաձեռնող խմբի լիազորի համաձայնության՝ մենք չենք կարող օրենքի նախագծի փոփոխություն անել։ Մենք կարող ենք այն կամ ընդունել, կամ մերժել»։
Կարդացեք նաև
Նա հորդորեց ընդդիմությանը խոսքը կտուրը չգցել ու ասել, որ ԵՄ-ին անդամակցությունն ի՞նչ վտանգ է սպառնում ՀՀ-ին և ո՞ւմ կողմից։
Տաթև ՀԱՐՈՒԹՅՈՒՆՅԱՆ
Հ. Գ. ԱԺ-ն առաջին ընթերցմամբ ընդունեց «ԵՄ-ին ՀՀ անդամակցելու գործընթացի մեկնարկի մասին» օրենքի նախագիծը։ Օրինագծին կողմ քվեարկեց 63 պատգամավոր, 7–ը դեմ էին, ձեռնպահ քվեարկություն չեղավ:
