Ռեժիսոր, պրոդյուսեր, բիզնեսմեն, հասարակական գործիչ, «Հայաթ փրոջեքթ Գյումրի» երաժշտական խմբի երգերի հեղինակ Ռուբեն Մխիթարյանը ևս կմասնակցի Գյումրու արտահերթ ՏԻՄ ընտրություններին։
Քիչ առաջ նա իր ֆեյսբուք սոցիալական ցանցում տեսանյութ էր հրապարակել՝ հանդես գալով հայտարարությամբ։ Ներկայացնելով իր գործունեությունը՝ Ռուբեն Մխիթարյանը պարզաբանեց, թե ինչու է ուզում առաջադրվել։
«Դուք ինձ նաև գիտեք որպես օրվա իշխանությունների դեմ պայքարող հանրային գործիչ, որի կարծիքը 2018 թվականի մայիսի 8-ից եղել է, կա ու մնում է անփոփոխ․ Գյումրիի ու Հայաստանի գլխավոր պրոբլեմը երևույթ է, որ անունը նիկոլիզմ է։ Եվ անձ է, որն ապրում է Երևանի կառավարական ամառանոցներից մեկում։ Հենց այդ գիտակցումն է, որն ինձ ստիպել է կայացնել իմ կյանքի վերաբերյալ հերթական շրջադարձային որոշումը։
Ես որոշել եմ առաջադրվել որպես Գյումրու քաղաքապետի թեկնածու «Իմ հզոր համայնք» մարդակենտրոն կուսակցության միջոցով, ձեզ ներկայացնելու եմ նոր քաղաքական և հայտնի համայնքային դեմքերի։
Կարդացեք նաև
Գյումրու քաղաքապետի աթոռը իմ համար ինքնանպատակ կամ կյանքի իմաստ չէ, ես ուղակի ուզում եմ իմ Գյումրիին, իմ համաքաղաքացիներին տալ իրական այլընտրանքի հնարավորություն, տալ տանից դուրս գալու և գնալու ընտրելու իրական այլընտրանք»,-ասում է ճանաչված պրոդյուսերը։
Նա նաև հայտարարում է, որ մրցակիցներին հակառակորդ, առավել ևս թշնամի չի դիտարկում, քանի որ բոլորն էլ քաղաքի մարդիկ են, իրար լավ են ճանաչում։
«Դիրքորոշումս շատ հստակ է, Գյումրի քաղաքի ընտրություններում օրվա իշխանությունները հաջողություն չպետք է գրանցեն, և այդ արդյունքին հասնելու համար ես պատրաստ եմ համագործակցել նման հստակ դիրքորոշում ունեցող մնացած բոլոր Գյումրիի քաղաքապետի թեկնածուների հետ։
Ինձ համար դրական արդյունք ես համարելու եմ օրվա իշխանությունների տապալումը, թե որ դեմքի կամ դեմքերի միջոցով է դա տեղի ունենալու, իմ համար ընդհանրապես էական չէ»,-պարզաբանում է Ռուբեն Մխիթարյանը։
Նա խոստանում է պայծառ, դրական քարոզարշավ։
Նունե ԱՐԵՎՇԱՏՅԱՆ
