44-օրյա պատերազմում Էջմիածնի «Քիմիկների զորամասի» պայմանագրային զինծառայողների զոհվելու, անհետ կորելու եւ գերեվարվելու գործով մեղադրվող ՀՀ ԶՈՒ ԳՇ պետի նախկին տեղակալ, գեներալ-լեյտենանտ Անդրանիկ Մակարյանը ՀԿԴ-ում այսօրվա նիստի ավարտին լրագրողների հետ կարճատեւ շփման ընթացքում ասաց. «Կասեմ հետեւյալը: Ես իմ կյանքը դրել եմ հայկական բանակում, մասնակցել եմ մարտական բոլոր գործողություններին: Թուրքի հետ ի՞նչ խաղաղություն: Թուրքը չի ուզում խաղաղություն մեզ հետ, ես չեմ հասկանում, ես չեմ պատկերացնում: Եթե կլինի խաղաղություն, միանշանակ ես դրան կողմ եմ»:
Հարցին, թե հինգ տարի այս դատավարությունն ընթանում է եւ այդքան անեծք ծնողների կողմից, ինքը մեղքի զգացողություն ունի՞, Անդրանիկ Մակարյանը պատասխանեց. «Մարդը բարձրագույն կրթություն ստանում է, որպեսզի ունենա բարձրագույն մտածելակերպ: Եվ իմացեք, թե ում ինչ հարց եք տալիս: Ես գեներալ-լեյտենանտ Մակարյանն եմ եւ ամբողջ կյանքը ծառայել եմ իմ հայրենիքին, իմ ժողովրդին: Դրա համար եմ ասում՝ պետք է ունենալ բարձրագույն մտածելակերպ»:
Հետաքրքրվեցինք. ինքը չի հավատում թուրքի հետ խաղաղությանը, իսկ Հայաստանի ղեկավարությունը թուրքի հետ խաղաղության է ձգտում՝ ի՞նչ կասեի, ինչպե՞ս դա կգնահատի: «Շատ լավ է, թող ձգտեն: Ես այդ հարցին արդեն պատասխանեցի. խաղաղություն այն թշնամու հետ, որը խաղաղություն է ցանկանում: Կլինի՞ խաղաղություն՝ դրա ամենամեծ կողմնակիցն եմ: Ամենից շատ խաղաղություն ուզում եւ ձգտում են զինվորականները, որովհետեւ իրենք են գիշեր-ցերեկ քաշքշվում, իրենք են կյանքը տալիս, իրենք են մնում առանց ընտանիքի»,-պատասխանեց գեներալ-լեյտենանտը:
Ճշտող հարցին, թե խաղաղություն չցանկացող թշնամու հետ խաղաղության ձգտումը երկիրը չի՞ տանում կործանման, Անդրանիկ Մակարյանը չպատասխանեց: «Նման հարցեր ինձ մի տվեք, ինձ զինվորական հարցեր տվեք, տվեք այնպիսի հարցեր, որին զինվորականը կարող է պատասխանել»,-ասաց նա:
Կարդացեք նաև
Ավելի հստակ ձեւակերպված զինվորական հարցին, թե բանակը սահմանից հետ քաշելը եւ ԱԱԾ սահմանապահ զորքեր տեղակայելը Հայաստանի անվտանգությանը օգո՞ւտ է, թե չէ, գեներալը պատասխանեց. «Ամեն մի գործողություն ունի իր նպատակը: Ես արդեն երեք տարի բանակից զորացրված եմ: Չեմ իմանում, թե ինչ է կատարվում ոչ առաջնագծում, ոչ երկրորդում եւ այլն: Արդեն ասացի, որ խաղաղության ձգտում են այն հակառակորդի հետ, որը դրա ցանկությունը ունի: Եթե ունի, խնդրեմ, մենք խաղաղության ամենամեծ երկրպագուն ենք: Ո՞վ է ուզում ամենամեծ խաղաղությունը: Բոլոր զինվորականները, որովհետեւ իրենք գիտեն դրա գինը՝ խաղաղության եւ պատերազմի գինը»,- պատասխանեց ԳՇ պետի նախկին տեղակալը:
Աշոտ ՀԱԿՈԲՅԱՆ
