«Ընդդիմության մեր գործընկերները առաջարկում են Երեւանում հանրային տրանսպորտի գինը սահմանել 100 դրամից պակաս: Փաստացի այն առաջարկը, որ ներկայացնում է պարոն Թորոսյանը եւ ազգային առաջընթաց խմբակցությունը նրա մասին է, որ բոլոր այն փոփոխությունները, որ արվել են արտոնությունների մասով, քաղաքական պատասխանատուն ՔՊ խմբակցությունն է, Հանրապետություն խմբակցությունը, ունենք առաջարկներ մեր մյուս ընդդիմադիր գործընկերներից»,-ավագանու նիստի ժամանակ ասաց Երեւանի քաղաքապետ Տիգրան Ավինյանը՝ խոսելով տրանսպորտի արտոնությունների փաթեթների տրամադրումից:
Նա ասաց, որ ընդդիմադիրները արտոնությունների փաթեթների ընդլայնմանը բոյկոտելու տրամաբանությամբ են մոտեցել: Ավինյանը դիմելով երեւանցիներին, ասաց, որ վճարած հավելյալ 50 դրամը ծառայում է մի քանի բանի. «Երեւան քաղաքում տրանսպորտի շարունակական զարգացմանը, ոչ այն դատարկ պոպուլիզմին, որի մասին խոսում են մեր ընդդիմադիր գործընկերները, այլ իրական… Դա ծառայում է բոլոր արտոնյալ խմբերին, որոնց տրվել է անվճար երթեւեկելու իրավունք…Հիմա թվեր են հնչեցվում, թե քանի տոկոսն է անվճար երթեւեկում»:
Ավինյանի ձեւակերպմամբ, ժամանակին Երեւանը 30 միլիարդ դրամ եկամուտ ուներ, դրան գումարած պետության կողմից տրված փողը, սակայն նրա խոսքով, այդ ժամանակվա իշխանությունը 60%-ով էր կարողանում ծախսել այդ գումարը: «Նախորդ տարվա մեր 64 միլիարդ դրամանոց բյուջեն, գումարած նաեւ պետական ծրագրերը, Երևանի քաղաքապետարանը 94% կատարողական ունի։ Դա նշանակում է տասնյակ մանկապարտեզներ հիմնանորոգված, հարյուրավոր բակեր հիմնանորոգված, բազմաթիվ ենթակառուցվածքներ, ասֆալտ կիլոմետրերով տասնյակ: Հիմա, պարոն Թորոսյան, դուք ուզում եք իրար հետ ոտ գցե՞նք, համեմատվե՞նք: Այստեղ համեմատվելու եզր չունեք…Դուք ստով մարդկանց գլուխը լցրել եք, թե տրանսպորտը դառնում է 300 դրամ»,-ասաց Տիգրան Ավինյանը՝ «Ազգային առաջընթաց» խմբակցության անդամ Արամ Թորոսյանին:
Կարդացեք նաև
Գոհար ՀԱԿՈԲՅԱՆ
