«Այս պահին տրանսպորտում հսկիչներ չկան, որոնք արձանագրում են խախտումները: Բայց ներկայումս աշխատանքներ տարվում են այդ մասով, առաջիկա քայլերի մասին կհայտարարվի: Այս պահին հսկիչներ չկան, որոնք տուգանքներ են դուրս գրում։ Այո, կան մարդիկ, որ հետևում են աշխատանքին, մարդկանց օգնում են, դրանք հսկիչներ չեն, քաղաքապետարանի հասարակական կարգի աշխատողներն են, որոնք զուտ մոնիտորինգ են իրականացնում»,- այսօր Երեւանի քաղաքապետարանում լրագրողների հետ զրույցում ասաց քաղաքապետարանի աշխատակազմի տրանսպորտի վարչության պետ Վազգեն Հարությունյանը:
Հարցին՝ իրեն չի՞ մտահոգում տրանսպորտում քաղաքացիների խցկված երթեւեկելու խնդիրը, Վազգեն Հարությունյանն ասաց. «Այդ մասով խնդիր կար հունվար ամսվա ընթացքում, հիմա բավականին կարգավորված է, նման խնդիր պետք է չլինի։ Կար խնդիր վարորդների հավաքագրման հետ կապված, քանի որ 171 նոր ավտոբուս էինք մտցրել երթուղիներ: Հիմա խնդիրը գրեթե կարգավորված է և երթուղիներում պակաս շարժակազմ այս պահին մեծ մասամբ չկա»:
Հարցին՝ ձեր կարծիքով տրանսպորտի բոյկոտը ստացվե՞լ է, թե չի ստացվել, նա արձագանքեց. «Ես ուղեվարձի հավաքագրման թվերին չեմ տիրապետում: Դա ֆինանսական վարչությունն է տիրապետում»:
Արփինե ՍԻՄՈՆՅԱՆ
