-Անի Խաչատրյանին եթե լսենք, ապա իրենք էլ ընդդիմություն են, բայց հասկանում ենք, որ ընդդիմություն չեն ու խաբել են իրենց ընտրողներին:
Ես շատ կուզեմ տեսնել, թե Ավինյանը երբ չլինի քաղաքապետ, ինչպես է գնալու միայնակ ու ման գա բակերով, նայի պատուհաններին ու ձայն խնդրի ժողովրդից: Հայկ Մարությանն այնպիսի քաղաքապետ է եղել, որ հանգիստ ժողովրդի մեջ է մտնում, ոչ թե իրենց պես «պադավատներում» պախկվում է,- այսօր ավագանու նիստից հետո լրագրողների հետ զրույցում ասաց «Ազգային առաջընթաց» խմբակցության անդամ Իզաբելլա Աբգարյանը՝ մեկնաբանելով «Հանրապետություն» խմբակցության ավագանու անդամ Անի Խաչատրյանի որակումները նախկին քաղաքապետ Հայկ Մարությանի վերաբերյալ:
Անդրադառնալով տրանսպորտի բոյկոտին` Իզաբելլա Աբգարյանն ասաց, որ բոյկոտն իրական է, եթե ՔՊ-ից մարդ կա, որ չի հավատում, թող իր հետ ավտոբուսներով երթեւեկի:
Կարդացեք նաև
Ըստ նրա՝ երբ ավտոբուսում լիքը մարդ է լինում, մարդիկ չեն վճարում, մեջտեղի դռներից են ներս մտնում, իսկ եթե քիչ մարդ է լինում, ամոթից վճարում են. «Իշխանությունը 150 դրամն օրինականացնելով՝ չեղարկեց իր իսկ փաթեթները, որովհետեւ տեսնում ենք, որ որեւէ մեկը փաթեթներով չի ուզում օգտվել, այնինչ Երեւանի տրանսպորտային ռեֆորմի կարեւորագույն բաղադրիչը հենց լավ մշակված փաթեթներ ունենալն է, ոչ թե մեկ տոմսի հույսին երթեւեկող քաղաքացիներ»:
Արփինե ՍԻՄՈՆՅԱՆ
