«Դրամայի տեսություն» առաջին անգամ հայերենով հրատարակված մեթոդական ուղեցույցը կօգնի ոչ միայն ավելի լիարժեք ու պրոֆեսիոնալ լինել մասնագիտական դաշտում, այլ գուցե վերջակետ դնի գրականագետների ու թատերագետների շրջանում հաճախ հանդիպող բանավեճին` ում տիրույթում է դրաման
Էդիթ Պրինտ հրատարակությունը առաջին անգամ հայերենով լույս է ընծայել «Դրամայի տեսություն» մեթոդական ուղեցույց գիրքը: Հեղինակն է բանասիրական գիտությունների թեկնածու, ԵԹԿՊԻ Վանաձորի մասնաճյուղի տնօրեն, Մարկ Տվենի անվան միջազգային մրցանակի դափնեկիր, դրամատուրգ Էլֆիք Զոհրաբյանը:
Հաճախ են գրականագետներն ու թատերագետները բանավիճում, թե ու՞մ է պատկանում կամ ու՞մ տիրույթն է դրաման: Մշտապես հաղթում են գրականագետները: Չէ՞ որ դրաման մինչև բեմադրվելը գրականություն է, այն կարող է և չբեմադրվել, բայց մնալ որպես ընթերցանության նյութ: Այս նուրբ հարցին ակամա պատասխան է տվել հեղինակը՝ Էլֆիք Զոհրաբյանը, որը գրքի նախաբանում մեջբերել է արվեստաբան Հենրիկ Հովհաննիսյանի խոսքը. «Դրամայի տեսությունը Արիստոտելից մինչև Լեսսինգ և Հեգել սկզբունքորեն գրականագիտական է»։
Կարդացեք նաև
Ի դեպ, մեթոդական ուղեցույցը հրատարակության է երաշխավորել Վանաձորի պետական համալսարանի գիտխորհուրդը: Այս առարկան հիմնականում անցնում են թատերական և բանասիրության բաժիններում: Դրամայի տեսության իմացությունը պարտադիր է հատկապես բեմադրիչների ու բանասերների համար: Ընդ որում, երիտասարդ գիտնականը այնպիսի թեմաների մասին է գրել, որոնց հայ գրականագիտության մեջ դեռևս անդրադարձ չէր եղել հոդվածի կամ ուսումնասիրության տեսքով: Ուսանողը, կարդալով գիրքը, կտեղեկանա՝ ինչ բան է ֆարսը, տրագիֆարսը, սոտին կամ փոքր դրաման և այլն: Գաղտնիք չէ, որ ոչ բոլոր բանասերները գիտեն ժանրերի ու ենթաժանրերի մասին: Էլ չասենք, որ թատրոններում, երբ բեմադրվում է աբսուրդի դրամա, ոչ միայն դերակատարները, այլ նաև ինչու ոչ՝ բեմադրիչը հաճախ չի տիրապետում նյութին կամ չունի աբսուրդի դրաման «բացելու» բանալին: Մինչդեռ գրքում, թեև հնարավորինս ամփոփ, բայց միևնույն ժամանակ հանգամանորեն տրվում է յուրաքանչյուր ժանրի ու ենթաժանրի, պիեսի կառուցվածքի մասին տեղեկույթ, ինչպես նաև գործնական առաջադրանքներ:
Ուղեցույցի խմբագիրն է բանասիրական գիտությունների թեկնածու, դոցենտ Վալերի Փիլոյանը, գրախոսները՝ բանասիրական գիտությունների թեկնածուներ, դոցենտ Գայանե Մալումյանը և պրոֆեսոր Անուշ Սեդրակյանը:
Առանձնահատուկ նշենք, որ ուսանողին հանձնարարվող պիեսների ցանկում ներառված են ոչ միայն դասական, այլ նաև ժամանակակից հայ հեղինակների ստեղծագործություններ: Անկասկած, դրամայի տեսության իմացությունը թատրոնի ու գրականության օժտված մասնագետներին կօգնի ավելի լիարժեք ու պրոֆեսիոնալ լինել մասնագիտական դաշտում:
Սամվել ԴԱՆԻԵԼՅԱՆ
