«Իմ քայլը» դաշինքից ՀՀ ԱԺ 7-րդ գումարման պատգամավոր, պատմաբան, պատմական գիտությունների թեկնածու, ԵԽԽՎ-ում Հայաստանի պատվիրակության նախկին անդամ, ադրբեջանագետ Տաթևիկ Հայրապետյանի տելեգրամյան գրառումը
Ռուս-ադրբեջանական վերջին շրջանի լարվածությունը վերլուծելիս զգուշավոր կարծիք էի հայտնել, որ դա կապված է ռուս-իրանական՝ վերջերս ստորագրված գործընկերության համաձայնագրի հետ։
Ամեն դեպքում, ես դրա մասին արտահայտվել եմ շատ զգուշավոր՝ հաշվի առնելով մատուցվող տեղեկատվության սահմանափակ լինելը։
Ուշագրավ է, որ ադրբեջանական «AZ TV» պետական հեռուստաընկերության վերջին թողարկման մեջ անդրադարձ է արվում ՌԴ-ի հետ հարաբերություններին, ինչպես նաև Իրանի դեսպանի վերջին հայտարարություններին։ Հաղորդավարը դա որակում է որպես փորձ՝ ստեղծելու «ռուս-իրանական տանդեմ՝ ընդդեմ Ադրբեջանի»։
Ես շարունակում եմ մնալ այն համոզման, որ ադրբեջանական կողմի՝ վերջին շրջանի քարոզչական արշավը նպատակ ունի տրամադրություններ շոշափել տարբեր տարածաշրջանային ու ոչ տարածաշրջանային խաղացողների մոտ՝ գործողությունների գնալու վերաբերյալ որոշումներ կայացնելուց առաջ։
