«Ժամանակակից Հայաստանում մի քիչ լավ չեն պատկերացնում, թե ինչի համար է իշխանությունը: Կան ուժեր, որոնք գիտեն, թե իշխանությունը նրա համար է, որ Ադրբեջանի հետ ավելի բարվոք դիրքում լինեն, ինչը ճիշտ է, բայց ամբողջ ճշմարտությունը չէ, որովհետեւ դու չես կարող ավելի բարվոք դիրքում լինել, քանի դեռ քո ժողովուրդն աղքատ է ու կրթության բազան շատ ցածր է»,- «Հայելի» ակումբում նշեց վավերագրող, հանրային գործիչ Հովհաննես Իշխանյանը:
«Եթե դու արդարության հիմքը փլուզում ես, ստանում ես Նիկոլ Փաշինյան: Ու թող որեւէ մեկը չմեղադրի ժողովրդին, որ գնացել-ընտրել է Նիկոլ Փաշինյանին: Նրանք չեն ընտրել Նիկոլ Փաշինյանին, նրանք դեմ են քվեարկել այն անարդարություններին, որոնք Սովետի փլուզումից հետո տեղի են ունեցել նրանց կյանքում, հաղթանակները հավասարապես չեն բաշխվել բնակչությանը, շուստրիները ավելի հարստացել են ու հարստահարել մյուսներին»,-հավելեց Հովհաննես Իշխանյանը՝ անդրադառնալով նախկինում եղած անառողջ բարքերին:
«Հիմա, երբ Նիկոլ Փաշինյանի վարկանիշը շրիշակից ցածր է, հարց է առաջանում, թե ինչ փիլիսոփայության հիմքի վրա պետք է դնենք հաջորդ իշխանություններին: Եթե դնելու ենք պարսավանքի, անեծքների, նսեմացումների վրա հաջորդ իշխանությանը, ապա 10 տարի հետո նորից Նիկոլ Փաշինյան ենք ձեռք բերելու; Եթե դնելու ենք իշխանությունը արժանիքների, արդարության, քաջալերանքի հիմքի վրա, այդ պարագայում կամ շատ ուշ կստանանք Նիկոլ Փաշինյան, կամ առհասարակ չենք ստանա: Նիկոլ Փաշինյանը ոչ միայն ներքին իրավիճակից է ծնվում, այլեւ արտաքին թշնամիների իրավիճակից: Քանի որ ունենք Թուրքիայի, Ադրբեջանի նման պետություններ, իրենք միշտ աշխատելու են, որ ծնվեն Նիկոլ Փաշինյաններ»,-ընդգծեց Հովհաննես Իշխանյանը:
Գոհար ՀԱԿՈԲՅԱՆ
