Տարբեր առեւտրի կենտրոնների աշխատակիցներ այսօր գործադուլ են անում եւ հավաքվել են կառավարության շենքի մոտ։ Նրանք բողոքում են հարկային բեռի ավելացման դեմ։
Փոքր եւ միջին բիզնեսի անունից հանդես եկող մասնագետները կառավարությանն առաջարկում են վեց ամսով հետաձգել հարկային փոփոխությունները։
Ցույցի մասնակիցներից շատերը խուսափում են խոսել լրագրողների հետ։ «Մարդիկ խուսափում են, ախ ու վախ կա մեջները։ Իրենք մտավախություն ունեն, որ ձեր լուսաբանումից հետո կհարձակվեն մեզ վրա, գայլերի ոհմակ է»,- ասաց ցույցի մասնակիցներից մեկը։
Կարդացեք նաև
Մեկ այլ տնտեսվարող էլ ասաց, որ պահանջում են՝ այս օրենքը պետք է վերանայվի, որովհետեւ ամբողջ բեռը դրել են փոքր ու միջին բիզնեսի վրա։
«Ինչո՞ւ եք ամբողջ ծանրությունը դնում մանրածախի վրա, մանրածախը չի կարող տակից դուրս գալ։ Մենք պահանջում ենք, որ կասեցնեն այդ օրենքը»,- ասաց նա։
«Նիկոլ Փաշինյանն ինքն է օրենքի հեղինակը, այս օրենքը միայն Նիկոլ Փաշինյանը կարող է հետ կանչել։ Մեր այս բողոքն ուղղված է Նիկոլ Փաշինյանի դեմ»,- ասաց ցույցի մասնակիցներից մեկը։
«Ժողովուրդ, ես ձեր գերին չեմ, եթե ինձ շատ նեղեք, կդադարեցնեմ այդ բիզնեսը եւ հարկերը չեմ վճարի»,- հայտարարեց մեկ այլ տնտեսվարող։
«Ստացվում է, որ պետությունը մեր եկամտի հետ 50-50 է մտնում։ Եվ 2018 թվականին փաստորեն ոչ թե հեղափոխություն է տեղի ունեցել, այլ Սաշիկի 50-50-ը մենք լեգիտիմացրել ենք»,- ասաց բողոքող ստոմատոլոգներից մեկը։ Նա նշեց, որ մինչեւ այս իրենց ոլորտում եւս 5 տոկոս շրջանառության հարկ էին վճարում, իսկ հունվարից մեկից 10 տոկոս է դարձել։
Ռոզա ՀՈՎՀԱՆՆԻՍՅԱՆ
Լուսանկարը՝ «Ազատության»
