Հատկապես պատերազմների, ընտրությունների ժամանակ մեծ տարածում ունեն քարոզչական կեղծ լուրերը, որոնց նպատակն է մոլորեցնել հանրությանը, խուճապ տարածել։
Aravot.am-ը ավատարների «Առավոտյանների ընտանիքի» շարքի այս հոլովակում անդրադառնում է այն խնդրին, թե ինչ հետևանքներ կարող է ունենալ քարոզչությունը, երբ անձինք չեն ստուգում տեղեկությունները։
Առավոտյանների ընտանիքի շարքի՝ այս հոլովակում ավատար-թոռնիկը պապիկի հետ երկխոսության ընթացքում ներկայացնում է, թե ինչպես կարող է տեսանյութն օգտագործվել քարոզչական նպատակով։
Օրինակ՝ ներկայացվում է 2020-ի հոկտեմբերին ադրբեջանական մամուլում ակտիվորեն տարածվող տեսանյութը, թե իբր հայերը փախչում են Լեռնային Ղարաբաղից։ Մինչդեռ այդ տեսանյութում հայ կամավորներն էին՝ ՀՀ-ից ԼՂ գնալու ճանապարհին։
Կարդացեք նաև
Թոռնիկը ցույց է տալիս, թե ինչպես կարելի է ստուգել տեսանյութը, գտնել բնօրինակը։ Հորդորում է տեղեկությունը ստուգել մի քանի աղբյուրում՝ նաև պաշտոնական։
Ինչպես տեղեկացրել էինք, Առավոտյանների ընտանիքում պապիկ, մայրիկ և թոռնիկ ավատարներն են: Նրանք ներկայացնում են մեդիագրագիտությանը վերաբերող կարճ տեսահոլովակների շարք՝ իրենց սերնդի թիրախային լսարանին հետաքրքրող՝ «Առավոտի» կայքէջում և սոցիալական հարթակներում։ Պարզ բառապաշարով, զվարճանքի տարրեր պարունակող տեսահոլովակների միջոցով անդրադարձ է կատարվում մեդիագրագիտությանը, թվային անվտանգությանն առնչվող տարբեր հարցերի։
Հոլովակներում ներկայացվում են տարբեր իրավիճակներ, կանոններ, որոնց պետք է հետևել մեդիագրագետ լինելու համար։
Ավատարները ստեղծվել են AI գործիքների միջոցով՝ նախ գեներացվել են ավատարների կերպարները, այնուհետև ներդրվել է ձայնը։
Այսինքն՝ այս նախագծի շրջանակում գործարկվում է մեդիագրագիտության տարածման տեխնոլոգիա +մեդիա մոդելը։
Մեդիագրագիտության վերաբերյալ կարճ հոլովակների շարքի ստեղծման անհրաժեշտություն է առաջացել՝ հաշվի առնելով հասարակության շրջանում նկատվող մեդիագրագիտության՝ ընդհանուր առմամբ ցածր մակարդակի և շատ դեպքերում տեղեկացվածության պակասի պատճառը։
Հոլովակները հասանելի կլինեն Առավոտի կայքէջում, սոցիալական ցանցերի էջերում շաբաթական երկու անգամ՝ ժամը 20։00-ին։
Տեսանյութում հատուկ ուշադրություն է դարձվում մեդիագրագիտության կարևորությանը։
Հոլովակում ներկայացվում են մեդիագրագիտության հիմնական կանոնները։
Տեսանյութը նպատակ ունի բարձրացնել հանրության շրջանում մեդիագրագիտության մակարդակը։
Տեսանյութը պատրաստվել է Հանրային լրագրության ակումբի «Hack2Check. մեդիա և տեղեկատվական գրագիտության հեքըթոն» ծրագրի շրջանակում, որն իրականացվել է Հայկական բարեգործական ընդհանուր միության հետ համագործակցությամբ՝ ԱՄՆ պետքարտուղարության Հանրային դիվանագիտության գրասենյակի դրամաշնորհի շրջանակում:
Տեսանյութում արտահայտված են հեղինակների տեսակետները, և դրանք պարտադիր չէ, որ համընկնեն ԱՄՆ պետքարտուղարության դիրքորոշման հետ։
Հոլովակները պատրաստվել են «ԿԱՅԾԵՐ» արհեստական բանականության տեխնիկական աջակցությամբ։
Տաթև ՀԱՐՈՒԹՅՈՒՆՅԱՆ
