«Զբոսաշրջային ոլորտը տարբեր կողմեր ունի, բացի փայլուն, գեղեցիկ շերտերից, որը հանգիստն ու ժամանցն են ցույց տալիս՝ կան բազմաթիվ այլ շերտեր եւս՝ շինարարություն, մարկետինգ, միջազգային հարաբերություններ եւ այլն»,-ասուլիսում նշեց Զբոսաշրջության կոմիտեի նախագահ Լուսինե Գեւորգյանը՝ ամփոփելով պաշտոնավարման 100 օրը:
Նա, ի թիվս այլնի, հայտնեց, որ համագործակցում են միջազգային վճարային քարտերից մեկի հետ, որը կարողանում է վիճակագրություն տրամադրել. «Մենք այս տարվա ընթացքում հստակ կունենանք տեղեկատվություն, թե մեկ օր եւ ավել Հայաստանում ապրած օտարերկրացու մեկ օրվա միջին ծախսի հստակ գումարը որքան է կազմում, կկարողանանք նաեւ արխիվային տվյալներ պահանջել 5 տարիների համար:
Իսկ այս պահին մեր ունեցած տվյալները հետեւյալն են՝ մենք գիտենք, որ անհատ զբոսաշրջիկը, որն ինքնուրույնաբար է պատվիրում իր թռիչքը, հյուրանոցը, ինքնուրույն է հոգում սնունդը, ծախսում է միջինում 700 դոլար, իսկ տուրօպերատորների միջոցով խմբերով Հայաստան եկող զբոսաշրջիկները, որոնց համար նախատեսվում է հյուրանոց, ռեստորան, ավտոբուս, ուղեկցորդ եւ այլ ծառայություններ, որոնք ներառված են տուրի մեջ, միջինում ծախսում են 2000 դոլար:
Մեր թիրախն է նպաստել կազմակերպված զբոսաշրջությանը, որովհետեւ մեր ենթակառուցվածքներին ավելի համապատասխան է կազմակերպված զբոսաշրջիկը, որը միջինում ավելի շատ է ծախսում»:
Կարդացեք նաև
Լուսինե Գեւորգյանը հավելեց, որ վերջին շրջանում ռուսաստանցի զբոսաշրջիկների թվի նվազում է նկատվում, փոխարենը աճել է ասիական երկրներից Հայաստան եկողների թիվը: Ըստ նրա, մասնավորապես ՌԴ-ից Հայաստան է այցելել շուրջ 938 հազար զբոսաշրջիկ, որը բոլոր զբոսաշրջիկների ընդհանուր թվի 43 տոկոսն է կազմում, երկրորդ տեղում Վրաստանն է, որտեղից Հայաստան է այցելել ավելի քան 280 հազար զբոսաշրջիկ, եւ դա ընդհանուր թվի 13 տոկոսն է կազմում, Իրանից եկած զբոսաշրջիկների թվի աճ կա՝ շուրջ 178 785 զբոսաշրջիկ է ժամանել Հայաստան, Չինաստանից եկող զբոսաշրջիկների թիվը եւս աճել է, ինչը հավանաբար պայմանավորված է ուղիղ չվերթներով:
«ՀՀ ԱԳՆ–ին գրություն ենք ուղարկել, որ աշխատանքներ տանեն կայքերից Սյունիքի վերաբերյալ վտանգավորության կարմիր գծերը հեռացնելու համար», նաեւ ասաց Լուսինե Գևորգյանը։
«Նոյեմբերի վերջին այցելեցի Սյունիքի մարզ, հանդիպել եմ զբոսաշրջային և նպատակային շուկայավարման կազմակերպում իրականացնող ընկերությունների ներկայացուցիչների հետ։ Սյունիքում կյանքը բուռն է, շատ լավ զարգանում է` անկախ այն հանգամանքից, որ որոշ միջազգային կայքերում և ՀՀ-ում գործող դեսպանությունների էջերում Սյունիքի մարզը նշված է կարմիր գծով։ Այս մասով մենք շատ ակտիվ աշխատանքներ ենք տանում տվյալ երկրների հետ»,– նշեց Զբոսաշրջության կոմիտեի նախագահը։
Գոհար ՀԱԿՈԲՅԱՆ
