«Գեղարդ». Ադրբեջանում դեռևս 2023 թվականին ձերբակալվել էր «Abzas Media»-ի կայքի տնօրեն Ուլվի Հասանլին: Խուզարկել էին նրա բնակարանն ու «Abzas Media»-ի գրասենյակը, որտեղ, ըստ ուժայինների տարածած հայտարարության, հայտնաբերվել էր 40 հազար եվրո: Ավելի ուշ բերման էր ենթարկվել փոխտնօրեն Մահամմադ Կեկալովը, իսկ հաջորդ օրը՝ արտերկրից վերադառնալուն պես, օդանավակայանում ձերբակալվել էր կայքի գլխավոր խմբագիր Սևինջ Վագիֆգըզըն: Պետք է նշել, որ նույն գործով ձերբակալվել էին նաև լրագրողներ Նարգիզ Աբսալամովան, Էլնարա Գասըմովան և հետաքննող լրագրող Հաֆիզ Բաբալըն:
Լրագրողներին մեղադրանք էր առաջադրվել քրեական օրենսգրքի մի շարք հոդվածներով՝ հանցավոր ճանապարհով ձեռք բերված գույքի օրինականացում, մաքսանենգություն, կեղծ փաստաթղթերի օգտագործում, հարկերից խուսափում և այլն: Մեղադրյալներից ոչ ոք չէր ընդունել առաջադրված մեղադրանքները՝ պնդելով, որ ձերբակալությունները կապված են իրենց մասնագիտական գործունեության հետ:
Առանձնահատուկ ուշադրության է արժանի ադրբեջանական մեկուսարաններում կանանց նկատմամբ իրականացվող բռնաճնշումները: Բոլորովին վերջերս ադրբեջանական ընդդիմադիր կայքերը գրել էին, որ Բաքվի քննչական մեկուսարանի կանանց բաժնի ղեկավար Ադալաթ Գուրբանովը ծեծի է ենթարկել 48-րդ խցիկում պահվող վեց կին բանտարկյալների: Այդ մասին էր հայտնել «Abzas Media»-ի կալանավորված գլխավոր խմբագիր Սևինջ Վագիֆգըզըն: Ըստ լրագրողի՝ մեկուսարանի կանանց բաժնի ղեկավարը ծեծից հետո նրանց տեղափոխել էր ավելի վատ պայմաններ ունեցող խցեր։ Գլխավոր խմբագիրը նշել էր նաև, որ կին քաղբանտարկյալներին սպառնացել են՝ հրահանգելով ոչինչ չխոսել ծեծի ենթարկվելու մասին:
Նյութն ամբողջությամբ՝ սկզբնաղբյուր կայքում:
