Aravot.am-ի տեղեկություններով, երեկ ոստիկանության Ամասիայի բաժին զեկուցագիր է ստացվել տեսուչներից մեկից առ այն, որ սահմանամերձ Մեղաշատ համայնքի միջնակարգ դպրոցի տնօրեն Գոհար Մազմանյանը 2023 թ․-ի հունվարի 3-ին կես դրույքի չափով՝ 37.000 դրամ աշխատավարձով, աշխատանքի է ընդունել հարևան Ողջի գյուղում բնակվող իր դստերը՝ Տ․Սարգսյանին՝ որպես համակարգչի օպերատոր, սակայն վերջինս աշխատանքի չի հաճախել։
«Նշված ժամանակահատվածից մինչ օրս Տ. Սարգսյանը, ստանալով աշխատավարձ և արձակուրդային վճար՝ ընդհանուր 893.227 դրամ գումար, չի հաճախել աշխատանքի և չի կատարել իր վրա դրված գործառութային պարտականությունները»,- նշված է զեկուցագրում։
Կազմված փաստաթղթերն ուղարկվել են ՀՀ հակակոռուպցիոն կոմիտե։
Հիշեցնենք, որ խոսքն այն դպրոցի մասին է, որը կառավարության որոշմամբ մտադիր են միավորել հարևան Բյուրակնի դպրոցի հետ։ Միավորվելու է նաև Ողջիի դպրոցը։
Գյուղի բնակիչները բազմիցս դուրս են եկել բողոքի՝ հիշեցնելով, որ Մեղրաշատը սահմանամերձ գյուղ է, ընդամենը մի ցանկապատ է բաժանում Թուրքիայից․ այստեղ մեծամասամբ զինծառայողերի ընտանիքներ են բնակվում․ ամեն մի ընտանիք 3-4 երեխա ունի։
Նրանք նաև նշում են, որ Ամասիայի խստաշունչ ձմռանը փոքրիկ երեխաները չեն կարող հասնել հարևան Բյուրակն, քանի որ այն 3-4 կիլոմետր է և չունեն նորմալ ճանապարհներ։
