«Երբ ասում ենք՝ եկամուտները հայտարարագրենք, չեք կարծո՞ւմ, որ քաղաքացիները, որոնք փոխանցումով էին տրանսֆերտներ ստանում, այլեւս կսկսեն դրանք ստանալ ընկերների, բարեկամների, ծանոթների միջոցով եւ չեն հայտարարագրի այդ գումարները»,- ԱԺ-ում հայտարարագրման թեմայով քննարկման ժամանակ ՊԵԿ նախագահ Էդուարդ Հակոբյանին դիմեց ՔՊ խմբակցության պատգամավոր Սերգեյ Բագրատյանը։
«Նախ տրանսֆերտը նվիրատվություն է, հետեւաբար, 300 հազար դրամի շեմի մեջ տեղավորվում է։ Եթե մարդը ստացել է մինչեւ 300 հազար դրամ տրանսֆերտ, դա չհայտարարագրվող է։ Այսինքն՝ մարդը որեւէ խնդիր չունի՝ հայտարարագրելու իր տրանսֆերտները, հետեւաբար, որեւէ խնդիր չեմ տեսնում այս տեսանկյունից»,- ասաց ՊԵԿ նախագահը։
Նա նշեց՝ այդ հարց է, որ մարդը ստանում է իր եկամուտները, ոչ թե տրանսֆերտներ։ Այսինքն՝ սեզոնային աշխատանքից վերադարձողները կարող են հետագայում փոխանցումով ստանալ իրենց վաստակած գումարը։ Բայց այդտեղ էլ, ըստ ՊԵԿ նախագահի, կարգավորում կա․ հիմնականում հարկային նոր պարտավորություն չի առաջանում։
«Ավելին ասեմ՝ նույնիսկ շեմ կա։ Մենք ասում ենք՝ եթե մինչեւ 12 մլն է այդ եկամուտը, ինքը ծագման թուղթ ունենալու խնդիր չունի։ Եթե դրանից ավելի է, պետք է ունենա, եւ հարկ որպես այդպիսին չի առաջանում, որովհետեւ հիմնականում եկամտային հարկի դրույքաչափը դրսում ավելի բարձր է, քան մեզ մոտ։ Եթե կլինեն դեպքեր, որտեղ եկամտային հարկը 20 տոկոսից ցածր է, այդ տարբերության չափով միայն պետք է վճարել ՀՀ-ում»,- ասաց ՊԵԿ նախագահը։
Կարդացեք նաև
Մանրամասները՝ տեսանյութում
Ռոզա ՀՈՎՀԱՆՆԻՍՅԱՆ
