«Մեր օրակարգի առաջին նախագիծն իմն է, որը ես կհետաձգեմ»,- ՀՀ ԱԺ Տնտեսական հարցերի մշտական հանձնաժողովի նիստի ժամանակ ՀՀ հարկային օրենսգրքում փոփոխություններ կատարելու մասին հարցի փաթեթի ներկայացումից առաջ տեղեկացրեց հանձնաժողովի նախագահ Բաբկեն Թունյանը։
Փոխարենը հանձնաժողովի նիստի ժամանակ քննարկվեց ՀՀ ԱԺ «Քաղաքացիական պայմանագիր» խմբակցության պատգամավոր Հայկ Սարգսյանի հեղինակած ՀՀ հարկային օրենսգրքում փոփոխություններ եւ լրացումներ կատարելու մասին փաթեթը։
Այս առիթով ՀՀ ԱԺ «Հայաստան» խմբակցության պատգամավոր Թադևոս Ավետիսյանը հետաքրքրվեց․ «Պարո′ն Թունյան, Ձեր նախագիծն ինչո՞ւ եք հանում, ինչո՞ւ եք հետաձգում շրջանառումը, կարծեմ դրական կարգավորումներ էր ներառում, և սենց պարագայում հետաձգումն այնքան էլ հարմար չէ»։
Բաբկեն Թունյանը պարզաբանեց․ «2020-ին մեր պատգամավոր գործընկերներ Արտակ Մանուկյանի և Վարազդատ Կարապետյանի հետ ընդունել ենք, առաջարկել ենք օրենսդրական փոփոխություն՝ ըստ որի մասնավոր ընկերությունների կողմից թողարկված պարտատոմսերից ստացված եկամուտներն ազատվում էին եկամտային հարկից։ Այս չորս տարվա ընթացքում մասնավոր ընկերությունների կողմից պարտատոմսերի թողարկման ծավալներն էապես ավելացել են։ Հարցն այն էր, որ նախագիծը ժամանակային սահմանափակում ուներ, և դրա գործողության ժամկետն ավարտվում էր 2024-ի դեկտեմբերի 31-ից։ Եվ նախագծով ֆինանսների նախարարության և կառավարության մեր մնացած գործընկերների հետ քննարկելով՝ որոշել էինք, որ ևս երեք տարի արտոնյալ ռեժիմ սահմանեինք։ Այս երեք տարվա ընթացքում մասնավոր պարտատոմսերը եկամտային հարկի պարտավորությունից պիտի ազատված լինեին։ Մենք նախատեսում էինք, որ երեք տարի հետո արդեն բոլորը կհարկվեին, բայց նախկինում թողարկված երկարաժամկետ պարտատոմսերն էլ պետք է չորրորդ տարում հարկվեին, իսկ եթե մենք հիմա օրենքում բան չփոխենք, իրենց՝ մինչև գործողությունների ավարտը չէին հարկելու։ Ստացվում է՝ 2022-2023-ին թողարկված պարտատոմսերը չորս տարի հետո պետք է հարկվեն, մինչդեռ ընկերությունները գիտեին, որ ուրիշ պայմաններ են լինելու իրենց համար։ Մի քանի այլ իրավական, տեխնիկական խնդիրներ էլ կան, դրանք կշտկենք, հետո կբերենք այս նախագիծը»։
Կարդացեք նաև
Տաթև ՀԱՐՈՒԹՅՈՒՆՅԱՆ
