Դեռ հունվարի առաջին օրերին Հայաստանի բռնցքամարտի ֆեդերացիայի մարզչական խորհրդի նիստում ՀԲՖ նախագահ Հովհաննես Հովսեփյանը փոփոխություններ էր կատարել հավաքականների մարզչական կազմում: Մասնավորապես, ազգային հավաքականի գլխավոր մարզչի պաշտոնը վստահվել էր Ռուդիկ Մկրտչյանին:
Այսօր «Դինամո» մարզադահլիճում անցկացված Հայաստանի տղամարդկանց առաջնության եզրափակիչ մենամարտերի ընթացքում Aravot.am-ը խոսել է նորանշանակ գլխավոր մարզչի հետ:
-Շնորհավորում ենք ազգային հավաքականի գլխավոր մարզչի պատասխանատու պաշտոնում նշանակվելու առիթով: Մի քանի օր է, ինչ արդեն նոր կարգավիճակով հետեւում եք մենամարտերին: Ի՞նչ կասեք:
-Շնորհակալություն շնորհավորանքի համար: Տղաները թեժ մենամարտեր են անցկացնում չեմպիոնության համար: Նրանք պատրաստվել են անձնական մարզիչների ղեկավարությամբ:
Կարդացեք նաև
Եվ ինչպես տեսնում ենք, լավ են մարզվել: Եզրափակիչները հետաքրքիր են ընթանում, չոր են: Այդպես էլ պիտի լիներ: Դա կարեւոր է: Փորձառու բռնցքամարտիկները կրկին բարձունքում են:
-Երիտասարդներ կա՞ն, որոնց անունները նշել եք ձեր մոտ:
-Անշուշտ: Երկու-երեք անուն առանձնացրել եմ ու կարծում եմ, որ նրանք տեղ կգտնեն ազգային հավաքականում: Իսկ ընդհանուր առմամբ, երիտասարդների մեջ առաջխաղացում կա որակական առումով, որովհետեւ նրանք արդեն իսկ հասցրել են փորձառություն կուտակել՝ դառնալով իրենց տարիքային խմբերում աշխարհի ու Եվրոպայի առաջնությունների մրցանակակիրներ:
-Երիտասարդական առաջնություններում հաղթանակներ տանելը դեռ մեծահասակների մեջ եւս հաջողություններ արձանագրելու երաշխիք չեն:
-Այո: Եվ Հայաստանի առաջնությունը նրանց համար առաջին փորձությունն է հաղթելու կամ մեդալ նվաճելու առումով: Կարծում եմ, խոստումնալից երիտասարդներին պետք է վստահել եւ իրենց դրսեւորելու հնարավորություն տալ:
-Ի՞նչ խնդիրներ եք դրել ձեր առջեւ 2025 մրցաշրջանում:
-Առաջին հերթին պատրաստվելու ենք ապրիլին Երեւանում կայանալիք միջազգային մրցաշարին, հետո՝ աշխարհի առաջնությանը, որի անցկացման վայրը դեռ որոշված չէ: Դրան կհաջորդի մինչեւ 22 տարեկանների Եվրոպայի առաջնությունը Երեւանում: Դա լրացուցիչ պարտականություն եւ պատասխանատվություն է մեր երկրում մեդալներ նվաճելու առումով:
-Եվ վերջին հարցը: Ձեզ պատրաստ տեսնո՞ւմ եք ազգային հավաքականի գլխավոր մարզչի ծանր ու պատասխանատու պաշտոնում:
-Ես երկար ժամանակ աշխատել եմ հավաքականների մարզիչների եւ տղաների հետ եւ եթե համաձայնել եմ, ուրեմն կարող եմ:
Աշոտ ՀԱԿՈԲՅԱՆ
